ஆகி கவிதைகள்

[ A+ ] /[ A- ]

26219448_1582774938478372_6503505523730096653_n26219448_1582774938478372_6503505523730096653_nநிதர்சனங்கள்

சாயங்கால வேளையில்
செவ்வாய்க்கிழமையென்று ஞாபகம்
தெற்கு வாசல்வழி சென்று
பொற்றாமரைக்குளத்தை நோக்கி
திரும்பிப்பாராது நின்றால்
சிக்கற்பாட்டின் உன்னதமான
மீனாட்சி அம்மன் கோயிலின்
புனிதசப்தத்தைக் கண்ணுறலாம்
அங்கிருந்து கூப்பிடு தூரத்திலுள்ள
எளிமைப்பாட்டின் உன்னதமான
புனித ஜார்ஜ் தேவாலயத்தில்
அமர்ந்துவிட்டு திரும்புகையில்
திரும்பிப்பாராது சற்று நின்றால்
புனிதநிசப்தத்தைக் கண்ணுறலாம்
அவற்றை கண்ணுற்று அவதானிக்கலாம்
இல்லாத பாதைகளில்
செல்லாத பாதைகளில் செல்வதுபோல்
செல்லத் துணிந்தால்
இதொன்றுமில்லையென்று இப்போது உறைக்கின்றது
செல்ல எத்தனித்தால்
துணிந்து செல்ல எத்தனித்தால்
எத்தனித்து சென்றால்
இன்னும் நிரம்ப காணக் கிடைப்பது நிதர்சனம்

ஊடாடல்

மார்சின் குடியரசுக்கு ஆயத்தமாகிக் கொண்டிருப்போர்
மார்சுக்குப் போகவில்லையா என்கின்றனர்
ஒற்றைக்கால்களில் நிற்கும் யார் இவர்கள்
நான் மென்றுகொண்டிருக்கிறேன்
வேறொருவனைக் கேளுங்கள்
எதையெல்லாமோ செரித்துக்கொண்டு
நிதானத்திற்கேயுள்ள அவசரத்தோடு
யாரோ எனக்கு வைத்தப் பொறியை
கொக்கியில் தொங்கவிடப்பட்ட அலமாரியையும்
கொக்கியுட்பட அனைத்தையும் கொறித்துக்கொண்டு
யாரெல்லாமோ வைத்தப் பொறிகளைத் தகர்த்து
பொறிவிட்டுப் பொறி பாய்ந்து
நானே வேறொருவனாக
எனக்குச் செதுக்கிய பொறியினுள் புகுந்து
தட்டுத்தடுமாறி
முடிவுகளின் இடைவெளிகளில்
முகர்ந்து
வியர்த்து விருவிருத்து
நுகர்ந்து
பல அடிகள் அகத்தினுள் வைத்து
ஊர்ந்து
இருந்தும் இல்லாமலும்
ஒலிகளின் அமைதிகளுக்கிடையில்
இருந்துமில்லாமலும்
சில அடிகள் புறத்தே வைத்து
இருந்தும் நகர்ந்தும்
இருந்துமாகியும்

கற்பைக் கண்டடைதல்

அதையோர் பத்தாண்டுக்கு முன் நீங்கள் இழந்தீர்கள் என்று வைத்துக்கொண்டால்
நிச்சயமாக உங்கள் குழந்தையிடம் நீங்களதனைக் கண்ணுறலாம்

அதையோர் பத்தரையாண்டுக்கு முன் நீங்கள் இழந்தீர்கள் என்று வைத்துக்கொண்டால்
ஒருவேளை உங்கள் குழந்தையிடம் நீங்களதனைக் கண்ணுறலாம்

அதாவது நீங்கள் உறையணிந்தவர் உள்ளிழுத்தவர் அல்லது கொடுத்துவைத்தவர்
இன்னும் என்னென்ன அதெல்லாம் இல்லை என்று வைத்துக்கொள்ளலாம் என்றால்

அதை இரு பத்தாண்டுகளுக்கு முன் நீங்கள் இழந்தீர்கள் என்று வைத்துக்கொண்டால்
ஒஞ்சோலிய பாத்துட்டுப் போய்யா போன்ற வசைகளை நீங்கள் கேட்கவிருப்பதனைத் தவிர்க்கலாம்

அதை மாதங்களுக்கு முன் நீங்கள் இழந்தீர்கள் என்று வைத்துக்கொண்டால்
உங்கள் துணைவியின் வயிற்றினுள் நீங்களதனைக் கண்ணுறலாம்

அதாவது அதனை இழந்ததை நீங்கள் இவ்வளவு விரைவில் நினைவுகூர்ந்து
அக் கண்டடைதலின் பெருஞ்சிக்கலை உணர்வீர்களானால்

நகைப்பிற்கிடங்கொடாத இருப்பிடம்

தன்னைக்கண்டு நகைப்பதுபோல்
தோற்றமளித்த மானுடரை
விசித்திர இருப்பில் இரும்பாய்
சமைந்த அகங்களில் வசிக்கும்
சூர்ப்பனகைகள் வேட்கையாடி
சித்திரவதைத்து வதைத்து
வதைந்து வதைத்து இரையாக்கி
அனைவரையும் திரித்து
குடலால் பின்னலிட்டு
நகையாக சூடிக்கொண்டனர்
சூர்ப்பனகைகளைக் கண்டு
இவர்கள் நகைத்தார்களா
சூர்ப்பனகைகளை உறுத்திய
நகைப்பொரு தோற்றப்புதிரியா
என்பதை பலகோணங்களில்
சிந்தித்த சித்தார்த்தர்
சூர்ப்பனகையின் இலங்கையை
சுமைதாங்காது தனது
வலங்கையிலிருந்து
இடங்கைகைக்கும்
பின்னர் இடங்கையிலிருந்து
வலங்கைக்கும் துல்லியமாக
மர்மந்துலங்கா புன்னகையுடன்
இலகுவாக நகர்த்திக்கொண்டார்
தனது வெறுமையான உலோகச்சட்டையில்
செந்நிற வியர்வை சுரந்து துவாரங்களில்
நச்சுப்புகை கசிந்து காலனெனும்
காலயந்திரத்துமுக்கி
விறைத்துறைந்து நின்றான்
தீவில் காணுந்திசையெங்கும்
தலையில்லாப் பனைமரங்கள்
பனைமரப் பொந்துகளின்
சிதிலமடைந்த கூடுகளினூடாக
தன்மானந்தேடும் மானுடர்
மேலும் பலர் கழுத்தில்
குற்றுயிரான நகைகளுடன்
தேடுவதறியாது நகர்ந்து
அழுகின்றாற்போல் நகைத்தனர்

மாதுவகம்

மருந்தகத்தில் ஆணுரையையும் சுகாதாரப்பட்டையையும்
மறைத்து செய்தித்தாளில் பொதிந்துக் தருகின்றாற்போல்
போரிலி நிலத்தில் மனிதவுடலைப் பொதிந்துத்தந்த
நாட்கள் இன்னும் அவள் நினைவினின்று அகலவில்லை
இப்போதைக்கு அவளை விட்டகலப் போவதுமில்லை

அவளகத்தில் முதலாளியாய் வாடிக்கையாளருக்கு
கண்ணீரைக் குடுவையிலிறக்கி பருகத் தருகின்றாள்
கரிக்கும் கண்ணீரைப் பருகுமொருவன் மயக்கம் தெளிந்து
நிதானமாக பேச்சரவத்தை மீறி உரக்கக் கூவுகின்றான்
மேலிடத்து உத்தரவின்றியும் கொன்றுக் குவித்திருப்பேன்

சட்டென்று அரவமற்றுப்போன நொடிகளைக் கிளித்துக்கொண்டு
வெடித்துக் கிளம்பிற்று காதைக்கிளிக்கும் பயங்கரச் சிரிப்பரவம்
மேலிடமாம் உத்தரவாம் கொன்றிறுப்பானாம் குவித்திருப்பானாம்
எல்லாம் செய்துவிட்டன்றோ பருகுகின்றோம் முந்திரிக்கொட்டை
தொண்டையில் இறங்குவதற்குள் என்னவெல்லாம் பிதற்றுகின்றான்

வழமையான வாடிக்கையாளனொருவன் ஆளரவத்தை
துடுப்பிட்டுக் கடந்து அமர்ந்திருப்பவள் முன்னின்று சொல்கின்றான்
நீ பரிமாறும் கண்ணீரில் கரிப்பும் உவர்ப்பும் முன்னைப்போலில்லை
இவ்வாறிவன் கூறுவதிது முதன்முறையன்று இவன் வருகையும்
முன்னைக்கிப்போது அதிகரித்துள்ளதன்றி குறைந்தபாடில்லை

இன்றைக்கு இவ்வளவே என்றவள் செவ்வொளி குமிழ்களை
சிமிட்டச் செய்தறிவிக்கவும் செவிவழி உட்புகுந்தோர் அவளின்
செவிகள் சார்த்தியிருக்க நாசிவழி முயற்சித்து அதுவும்
சார்த்தியிருக்க இன்றைக்கு வசமாக மாட்டிக்கொண்டோமென்று
அவளின் கண்கள் அவர்களில் பதிந்திருக்க வாய்வழி வெளியேறினர்

Comments are closed.