Category: அறிவியல்

அளவும் அறிவியலும் / முனைவர். ஆர். சுரேஷ்

images (8)

நம் அன்றாட வாழ்வில் அளவற்று புழங்கும் சொல் ‘அளவு’. ஆம், உடுத்தும் உடை, உண்ணும் உணவு, வாழும் இடம், சொல்லும் சொல் எல்லாவற்றிற்கும் அளவு உண்டல்லவா? அவ்வாறே, பயன்படுத்தும் கருவிகளாம், கணினி, தொலைக்காட்சி, அலைபேசி, வாகனம், முதலியன யாவும் பிரத்யேக அளவுடையாதாய் இருக்கின்றன. அறியாமலோ அல்லது அறிந்தும் உணராமலோ அளவினை பயன்படுத்தும் (சொல்லாகவோ அல்லது பொருளாகவோ) இடங்கள் ஏராளம்! வழக்கத்தில் வந்தேரிப்போன அளவு, அறிவியல் மற்றும் தொழிற்நுட்ப (அறிவியலின் பயன்பாடு) துறையின் அடிப்படையாக திகழ்கிறது. நம் வாழ்விலிருந்து நீக்க முடியா (வாழ்நாளும் அளவுடையதாயிற்றே!) அளவின், அறிவியல் பற்றி இங்கு காண்போம்.

அளவு என்பது வெற்றிடத்தில் ஒரு பொருள் (அல்லது ஏதேனும் ஒன்று) கொள்ளும் (occupy) இடம் பற்றிய செய்தியை குறிப்பதாகும். அளவினை அலகுகளால் (units) அளக்கிறோம். பொதுவாக, ஒன்றின் நீளம், அகலம், உயரம், பரப்பளவு, நிறை முதலிய செய்திகளை பற்றி தெரிவிப்பதாக அது அமைகிறது. அதாவது, ஒரு பொருளின் பரிமாணத்தை (dimension) தெரிவிப்பதாக அளவுகள் அமைகின்றன. உதாரணமாக, உயிரற்றவைகளின் அடிப்படையாம் அணுவின் மையத்தில் அமைந்திருக்கும் அணுக்கருவின் (புரோட்டான் மற்றும் நீயுட்ரான்களின் கூட்டு) விட்டம் ஃபெம்டோ (10-15, 10ன் மடங்கு -15) மீட்டர் அளவுடையது. அணுவின் ஆரம் (radius) பிக்கோ (10-12, 10ன் மடங்கு -12) மீட்டர் வரம்பில் அமைந்திருக்கிறது. இவ்வணுக்கள் இணைந்து மூலக்கூறினை உருவாக்குகின்றன. பொதுவாக, ஒரு மூலக்கூறின் அளவு அதனை உண்டாக்கும் அணுக்களை பொருத்து அமைகிறது. உதாரணமாக, இரு பங்கு ஹைட்ரஜனும் ஒரு பங்கு ஆக்ஸிஜனும் சேர்ந்து உண்டாகும் நீர் மூலக்கூறின் விட்டம் ஆம்ஸ்ட்ராங் (10-10, 10ன் மடங்கு -10) அளவுடையதாகும். எண்ணற்ற நீர் மூலக்கூறுகள் ஒன்றினைந்து, நிறமற்ற நீர்மமாக நமக்கு காட்சியளிக்கிறது. நீர், இருக்கும் கலனை பொருத்து, அதன் கொள்ளளவினை அறியலாம்.

சரி, ஒரு பொருளின் பரிமாணத்திற்கும் (நீளம், அகலம் முதலியன) அதன் பண்பிற்கும் தொடர்பு இருக்கிறதா? இருக்கிறது என்று தான் சொல்ல வேண்டும். உதாரணத்திற்கு, இரும்பு ஆணியை கருதுவோம். இயல்பாகவே, இரும்பு துரு பிடிக்கும் என்பதன் அடிப்படையில், இரும்பு ஆணியும் துரு பிடிக்கத்தானே செய்யும். இங்கு, ஆணியின் எப்பகுதி விரைவில் துரு பிடிக்கும் என்ற கேள்வி எழுகின்றது. இதற்கு பதில், ஆணியின் தலை மற்றும் நுனி பகுதி என்பதே! ஆம், ஆணியின் தலை பகுதியை தட்டையாக்கவும், நுனிபகுதியை கூர்மையாக்கவும், அதிக அளவு அழுத்தம் கொடுக்கப்படுகிறது. எனவே, அப்பகுதிகள், ஆணியின் தண்டு (ஒப்பீட்டளவில் அதிக அகலம்) பகுதியை கட்டிலும் அளவில் மிகவும் மெல்லியதாக மாறுகிறது. கொடுக்கப்பட்ட அழுத்தத்தினாலும் (அழுத்தத்தால் இரும்பும் உருமாறுகிறதே!), மெல்லிய தடிமனாலும் ஆணியில் தட்டை மற்றும் கூர்மை பகுதிகள் (ஒப்பீட்டளவில் மிக குறைந்த அகலம்) எளிதில் துருவாகின்றன. அதாவது, அகலமான பகுதியை காட்டிலும், மிக குறைந்த அகலம் கொண்ட ஆணியின் பகுதிகள் எளிதில் துரு பிடிக்கும் பண்பினை பெற்றிருக்கிறது. இதிலிருந்து, பரிமாணத்திற்கும், பண்பிற்கும் தொடர்பு உண்டு என்பதனை அறிய முடிகிறது அல்லவா?

மற்றுமொறு உதாரணமாக, வானவில் நிறங்களை கருதுவோம். வானவில் நிறங்கள் ஏழு என்பதை நாம் அறிவோம். அவற்றில் நீலம், பச்சை, மங்சள், சிவப்பு முதலிய நிறங்களை நம்மால் எளிதாக காண (வானவில் தோன்றும் பொழுது) முடியும். இதற்கும், அளவிற்கும் என்ன தொடர்பு? என்ற வினா எழலாம்! நிச்சயமாக தொடர்பு உண்டு! ஆம், வானவில்லின் ஏழு நிறங்களும், சூரிய கதிரான வெள்ளொளியிலிருந்து பிரிகை அடைவதன் மூலம் உண்டாகின்றன. பொதுவாக, ஒளிக்கதிருக்கு அலைநீளம் என்ற பண்பு உண்டு. அதன் அடிப்படையில் ஒவ்வொறு நிற கதிருக்கும் ஒவ்வொறு அலைநீளம் இருக்கின்றது. உதாரணமாக, நீல நிற ஒளிக்கதிரின் அலைநீளம் 450 முதல் 495 நானோ மீட்டர் ஆகும். மங்சள் நிற ஒளிக்கதிரின் அலைநீளம் 570 முதல் 590 நானோ மீட்டர். சிவப்பு நிற ஒளிக்கதிரின் அலைநீளம் 620 முதல் 750 நானோ மீட்டராக இருக்கிறது. அதாவது, ஒளிக்கதிரின் அலைநீளத்தை சொன்னால், அக்கதிரின் நிறத்தை சொல்ல முடியும். இதிலிருந்து நாம் அறிவது என்னவெனில், அளவினை சொன்னால், அதன் (நிறம் ஒரு பண்பாகும்) பண்பினையும் சொல்ல முடியும் என்பது தானே?

வாழ்விலும், ஒருவரது பேச்சின் அளவினை வைத்து அவரது பண்பினை கண்டறிவது சாத்தியம் தானே?

சரி, அளவு பண்பினை அறிய உதவுகிறதெனில், பண்புகள் அளவினை பொருத்து மாறுவதும் நிச்சயம் தானே? மேலோட்டமான உதாரணம் ஒன்றினை பார்போம். முதலில், பூஞ்சை, பாக்டீரியா மற்றும் வைரஸ் ஆகியனவற்றை கருதலாம். இவற்றில் எதை குறித்து நாம் அஞ்சுவோம்? நிச்சயமாக வைரஸ் தானே? காரணம், அதன் தீங்கிழைக்கும் (நோயினை உண்டாக்க கூடிய) பண்பு! மேலும் பூஞ்சையும், பாக்டீரியாவும் உயிரினத்தில் சேர்ந்தவை. வைரஸோ, உயிருள்ளவையாகவும், உயிரற்றவையாகவும் செயல்பட கூடியது. இங்கும் அளவிற்கும் பண்பிற்குமான நெருங்கிய தொடர்பு உண்டு என்று கருதுகிறேன. அதாவது, பூஞ்சையின் (காலான்) உடல அளவு நம் கண்களுக்கு புலப்பட கூடியதே! பாக்டீரியாவின் அளவோ (செல்லின் விட்டம்) மைக்ரோ மீட்டர் வரம்புடையது. எனவே, வெற்றுக்கண்ணால், இவைகளை காண இயலாது. நுண்ணோக்கியின் வழியாக மட்டுமே இவைகளை காண முடியும். வைரஸ்களோ, நானோ மீட்டர் அளவில் இருக்கின்றன. பாக்டீரியாவை காட்டிலும் மீச்சிறியது வைரஸ். எனவே, நுண்ணோக்கியால் கூட வைரஸினை காண முடியாது! ஆக, பூஞ்சை, பாக்டீரியா மற்றும் வைரஸின் பண்புகள் மாறுவதை அறிகிற அதேவேலையில், அவற்றின் அளவும் சீறாக குறைந்து கொண்டே செல்வதை இங்கு சுட்டிகாட்ட விழைகிறேன். ஒருவேளை, வைரஸின் விந்தையான பண்புகளுக்கு அதன் மீச்சிறு அளவே கூட காரணமாக அமைந்திருக்கலாம்!

சரி, மேற்கண்ட உதாரணங்களின் மூலம் சொல்ல வந்த கருத்து எதுவென்றால், ‘அளவினை பொருத்து பண்புகள் மாறும்’ என்பது தான். இதன் அடிப்படையிலேயே, தற்போது விஸ்வரூபம் எடுத்திருக்கும் நானோ தொழிற்நுட்பம் செயல்படுகிறது. வாருங்கள், நானோ தொழிற்நுட்பம் பற்றிய சில அடிப்படை தகவல்களை இனி பார்போம்.

‘நன்னாஸ்’ (nanos) என்ற கிரேக்க சொல்லிலிருந்து ’நானோ’ என்ற சொல் பெறப்பட்டுள்ளது. ’நன்னாஸ்’ என்பதற்கு ’சிறிய’ அல்லது ‘குல்லமான’ (dwarf) என்று அர்த்தமாம். ஆக, நானோ என்பதற்கும் சிறிய அல்லது குல்ல என்பதே பொருள். சிறிய என்று சொன்னால், எந்த அளவிற்கு சிறியது என்ற கேள்வி எழுகிறது அல்லவா? இதற்கான விடையாகவே, 10-9 (10ன் மடங்கு -9) என்ற எல்லையை விஞ்ஞானிகள் தந்தனர். எனவே, நானோ மீட்டர் என்பதற்கு 10-9 மீட்டர் என்பதே வரையறை ஆகும். அதாவது, ஒரு பொருள், ஏதேனும் ஒரு பரிமாணத்தில் ஒன்றிலிருந்து நூறு நானோமீட்டர் அளவுடையதாக இருந்தால் அதற்கு நானோ பொருள் (அளவில் மீச்சிறியதாக இருப்பதால் ‘பொருளை’ ‘துகள்’ எனக்கொள்க) என்று பெயர். நானோ பொருட்களை அடிப்படையாக கொண்டு செயல்படும் தொழிற் நுட்பத்திற்கு நானோ தொழிற்நுட்பம் என்று பெயர். எவ்வொறு தொழிற்நுட்பத்திற்கும் அறிவியலே அடிப்படையாக இருக்கிறது. எனவே, நானோ பொருளின் அறிவியலை நானோ அறிவியல் எனலாம்.

பொதுவாக, நானோ பொருட்களை பற்றி படிக்கும் பிரிவிற்கு ‘நானோவியல்’ (நானோ+இயல்) என்ற சொல்லை பயன்படுத்தலாம் என்று கருதுகிறேன். ஆம், வேதிபொருட்களை பற்றி படிக்கும் பிரிவிற்கு வேதியியல் (வேதி+இயல்) என்றும், பொருளின் இயல்பினை பற்றி படிக்கும் பிரிவிற்கு இயற்பியல் (இயல்பு+இயல்) என்றும் அழைக்கப்படுகிறதே!

முன்னதாக அளவை பொருத்து பண்புகள் மாறும் என்பதை பார்த்தோம் அல்லவா? குறிப்பாக, நானோ மீட்டர் அளவுடைய பொருளின் பண்புகள், அதன் மைக்ரோ அல்லது அதற்கும் அதிகமான (மீட்டர் அளவில்) அளவினை காட்டிலும் பெருமளவு வேறுபடுகிறது. உதாரணத்திற்கு தங்கத்தை (gold) கருதலாம். பொதுவாக தங்கத்தின் நிறம் என்ன? என்று கேட்டால் மிளிரும் மஞ்சள் (சேர்க்கப்படும் சிறிதளவு உலோகத்தை பொருத்து மிதமான நிற வேறுபாடு இருக்கலாம்) என்று தானே சொல்வோம். ஆனால், தங்கம் சிவப்பு, பச்சை மற்றும் நீல நிறத்திலும் இருக்கிறது! ஆம், தங்கத்துகளை நானோ மீட்டர் அளவிற்கு குறைத்தால், இந்நிறங்களை பெறலாம். உதாரணமாக, தொண்ணூறு, என்பது, அறுபது, மற்றும் இருபது நானோமீட்டர் விட்டமுடைய தங்க துகளின் நிறம் முறையே, சிவப்பு, மஞ்சள், பச்சை, மற்றும் ஊதா நிறமாகும்.

மேலும், பெருத்த பருமனான (bulk state) நிலையிலிருந்து ஒரு பொருள் நானோ மீட்டர் அளவிற்கு கொண்டு செல்ல, அதன் மின்னாற் (electrical) பண்பு, காந்த (magnetic) பண்பு, வினையூக்க (ஒரு வினையின் வேகத்தை அதிகரிக்க கூடிய) பண்பு முதலிய பல வகையான பண்புகள் பெருமளவு மாறுபடுகின்றன. இத்தகைய விரும்பத்தகு பண்புகளை கொண்ட நானோ துகள்கள் பல துறைகளிலும் பயன்படுத்தப்படுகிறது. உதாரணமாக, பெருத்த பரும நிலையை காட்டிலும், நானோ மீட்டர் அளவுடைய வெள்ளிதுகள்கள் மிகச்சிறந்த கிருமி நாசினி பண்பினை பெற்றிருக்கின்றன. குறிப்பிட்ட வகை வைரஸை கொல்லும் கிராஃபின் ஆக்ஸைடு (கார்பனின் ஒரு வடிவம்) நானோதாள் தயாரிக்கப்பட்டுள்ளது. எளிதில் அழுக்கு படியாத மற்றும் தீ பிடிக்காத ஆடைகள், சுயசுத்தம் செய்து கொள்ளும் வீட்டு வண்ண பூச்சுக்கள் (self-cleaning paint), புற்று நோய் சிகிச்சையில் பயன்படும் நானோ மருந்துகள் உள்ளிட்ட எண்ணற்ற பயன்களை நானோ மீட்டர் அளவுடைய பொருட்களால் பெறமுடிகிறது.

சரி, நானோ தொழிற்நுபத்தின் தொடக்கம் எது? என்று கேட்டால், பொதுவாக, பத்தொன்பதாம் நூற்றாண்டின் மத்தியில் என்றே கூறலாம். காரணம், 1959 ஆம் ஆண்டு, புகழ் பெற்ற அமெரிக்க நாட்டு இயற்பியல் விஞ்ஞானியான இரிச்சர்ட் ஃபெயின்மன் (Richard Feynman) அவர்களின் ‘There’s Plenty of Room at the Bottom’ என்ற தலைப்பிலான உரையில், நானோ அறிவியலுக்கான விதையை தூவினார். பின்னர், 1974 ஆம் ஆண்டு, டோக்கியோ அறிவியல் பல்கலைக்கழக பேராசிரியான நோரியோ டானிகுச்சி (Norio Taniguchi) அவர்களால் தான் நானோ தொழிற்நுட்பம் (nanotechnology) என்ற சொல் முதன்முதலாக பயன்படுத்தப்பட்டது. பின்னர் படிப்படியாக வளர தொடங்கிய இத்தொழிற்நுட்பமானது, 1980 களில் தனிப்பொரும் துறையாக எழுர்ச்சி பெற தொடங்கியது. இதற்கு காரணம், இரண்டு முக்கிய கண்டுபிடிப்புகளே! ஒன்று ’ஸ்கேனிங் டனலிங் மைக்ரோஸ்கோப் (Scanning Tunneling Microscope) எனப்படும் மீநுண்ணோக்கியாகும். இக்கருவியின் மூலம், அணுக்களையும் பார்க்கலாம்! இரண்டாவது ‘அட்டாமிக் ஃபோர்ஸ் மைக்ரோஸ்கோப்’ (Atomic Force Microscope) எனப்படும் மற்றுமொறு கருவியாகும். இக்கருவிகளே, புதிய நானோ உலகை படைக்க அடிகோலின. ஆம், ஆடை, உணவு பாதுகாப்பு, அழகுசாதன பொருட்கள், கண்ணாடி, மருந்து, உள்ளிட்ட பல பொருட்களிலும் நானோ தொழிற்நுட்பம் பயன்படுத்தப்படுகிறது. இன்றளவில் ஏறக்குறைய எல்லா துறைகளிலும் நானோ தொழிற்நுட்பம் தனது முத்திரையை பதிக்க தொடங்கியுள்ளது.

மேற்கண்டவாறு, இன்றைய நவீன நானோ தொழிற்நுட்பத்தின் தொடக்கம் பத்தொன்பதாம் நூற்றாண்டு என்ற பொழுதிலும், இத்தொழிற்நுட்பம், பழங்காலம் முதலே பயன்படுத்தப்பட்டு வந்திருக்கிறது. ஆம், கி.மு. பதின்மூன்று மற்றும் பதிநான்காம் நூற்றாண்டுகளிலேயே, உலோக நானோதுகள்கள் பயன்படுத்தப்பட்டு வந்திருக்கிறது. மேலும், ஜன்னல் கண்ணாடி கதவுகளில் சிவப்பு நிற தாமிர ஆக்ஸைடு நானோதுகளும் பயன்படுத்தபட்டு வந்திருப்பது கண்டுபிடுக்கப்பட்டுள்ளது.

பழங்கால நானோதொழிற்நுட்பத்திற்கு அடையாலமாக லைகர்கஸ் கண்ணாடி கோப்பையை (Lycurgus Cup) சொல்லலாம். நான்காம் நூற்றாண்டை சார்ந்த ரோம நாட்டு கலைபடைப்பான இக்கோப்பை இரு வண்ணங்களில் (dichroism) காட்சியளிக்க கூடியது. அதாவது கோப்பையின் உள்ளிருந்து வெளியே ஒளியை பாய்ச்சும் பொழுது, அக்கோப்பை சிவப்பு (அல்லது ரூபி நிறம்) நிறத்தில் தெரியும். அதுவே, வெளியிலிருந்து ஒளியை கோப்பையின் மீது உமிழ, கோப்பை பச்சை-மஞ்சள் நிறத்தில் தெரியும். இதற்கு காரணம், இக்கோப்பையில் மிகச்சிறிதளவு தங்கம் மற்றும் வெள்ளி நானோதுகள்கள் சேர்க்கப்பட்டிருப்பது தான் என தெரியவந்துள்ளது. பழங்கால நானோதொழிற்நுட்பதிற்கான இன்னும் பல சான்றுகள் கண்டுபிடிக்கப்பட்டுள்ளன. ஆயினும், நவீன நானோ தொழிற்நுட்பம் பிரம்மாண்டமான வளர்ச்சியை அடைந்து கொண்டிருக்கிறது என்றால் அது மிகையல்ல.

••••

அணுவிலிருந்து அண்டம்! / முனைவர். ஆர். சுரேஷ்

images (19)

ஒரு விதையிலிருந்து வளரும் விருட்சம், உயிரணுவிலிருந்து உருவாகும் முழுவளர்ச்சியுற்ற உயிரினம், ஒரு புள்ளியிலிருந்து வரையப்படும் அழகிய ஓவியம், ஒரு கல்லில் தொடங்கி கட்டி முடிக்கப்படும் பிரம்மாண்ட கட்டிடம், இவைகள் எல்லம் நமக்கு உணர்த்துவது என்ன? உருவத்தில் பெரியவைகள் அனைத்தும் அதற்குறிய மூலப்பொருளான ஒரு சிறிய அமைப்பில் இருந்து தோன்றுகிறது என்பதை தான் அல்லவா? இது உன்மை என்றால், அளவிட முடியா இப்பேரண்டமும், அதன் மூலப்பொருளிலிருந்து தொடங்கி இருக்க வேண்டும் அல்லவா? பல அறிவியல் அறிஞர்கள் தங்களது அயராத கடின உழைப்பாலும், அபார அறிவுத்திறனாலும், அண்டம் உருவானதை இவ்வுலகிற்கு உணர்த்தியுள்ளனர். அதேவேளையில், இயற்கையோடு இயந்து வாழும் நெறிமுறைகளையும், இப்பூவுலகில் தொடங்கி மேலுலகமான வீட்டை அடைவதற்கான வழிமுறைகளையும் தெளிவாய் வகுத்து அளித்திருக்கும் நம் மூதாதயர்கள், அண்டம் பற்றி என்ன சொல்லியிருக்கிறார்கள். வாருங்கள், பரஞ்சோதி முனிவர் இயற்றிய திருவிளையாடற் புராணத்தில் இது குறித்து இருக்கும் குறிப்பினை பற்றி காண்போம்.

அண்டங்க ளெல்லா மணுவாக வணுக்க ளெல்லாம்
அண்டங்க ளாகப் பெரிதாய்ச்சிறி தாயி னானும் (திருவிளையாடற் புராணம், பரஞ்சோதி முனிவர்).

மேற்கண்ட வரிகளின் கருபொருள், ‘அண்டங்கள் எல்லாம் சிறிய அணுக்களாகவும், அணுக்கள் எல்லாம் பெரிய அண்டங்களாகவும் தோன்றுகிறது’ என்பதே. அதாவது, அணுக்கள் ஒன்று கூடி அண்டங்களை உருவக்கியிருக்கிறது என்பதை அறிய முடிகிறது அல்லவா?

பொதுவாக, ஒரு பொருள் தோன்றுகிறது என்றால், அது தோன்றிய மூலப்பொருளின் சாயல் இருக்கும். உதாரணமாக, மாமர விதையிலிருந்து வளரும் செடியும் மாமரமாகத்தான் இருக்கும். அதாவது, விதை கொடுத்த மாமரத்தின் சாயல், புதிதாய் வளரும் மாமரத்தில் இருப்பது நிச்சயம். இதேப்போன்று, அணுக்கள் மூலப்பொருள் என்றால், அவற்றிலிருந்து தோன்றிய அண்டத்தில், அணுவின் சாயல் இருக்க வேண்டும் தானே? இருக்கிறதா என்பதை பார்போம்.

முன்னதாக, அணுவை பற்றிய சில அடிப்படை தகவலை இங்கு நினைவூட்ட விரும்புகிறேன்.

உயிரற்றவைகளின் அடிப்படையாக, அணுக்கள் இருப்பதை இன்றைய அறிவியல் உலகம் பல ஆய்வுகளின் மூலம் கண்டறிந்ததோடு, அதன் அமைப்பையும் நன்கு விளக்கியுள்ளது. பல அறிவியல் அறிஞர்களின் அயராத உழைப்பில் கண்டறியப்பட்ட அணுவின் அமைப்பை சுருக்கமாக இங்கு குறிப்பிடுகிறேன்.

அணுவின் மையத்தில் உட்கரு அமைந்துள்ளது. இதில் புரோட்டான் எனப்படும் நேர்மின் துகள்கள் கூட்டாக (தனிமத்தை பொருத்து இவற்றின் எண்ணிக்கை மாறுபடும்) இருக்கின்றன. அதீத ஆற்றல் கொண்ட இவ்வுட்கருவினுள், மின்சுமையற்ற நியூட்ரானும் உண்டு. உட்கருவின் விட்டம் ஃபெம்டோ மீட்டர் அளவுடையது. உட்கருவினை வட்ட மற்றும் நீள்வட்ட பாதையில் சுற்றி வரும் எலக்ட்ரான்கள் எதிர்மின் சுமை கொண்டவை. அணுவின் அமைப்பு மிக எளிதாக இருப்பினும், இதனுள் பொதிந்துள்ள அறிவியல் தத்துவங்கள் அதிகம். சில விந்தையானவையும் கூட! இவற்றுள் ஒரு சில தத்துவங்களை மட்டும் இங்கு பார்ப்போம்.

அணுவின் உட்கரு ஆற்றல் மிக்கது. எந்த அளவிற்கு ஆற்றல் மிக்கது? இக்கேள்விக்கான பதில் அளவிட முடியாது என்பதே! ஆம், அணுக்கரு சிதைவினால் உண்டாகும் ஆற்றலை அடிப்படையாக கொண்டு செயல்படும் அணுகுண்டின் அற்றலை அளக்க முடியுமா?

சரி, அளவிட முடியா ஆற்றல் படைத்த உட்கருவின் விந்தை என்ன தெரியுமா? அதில் உள்ள துகள்களின் மின்சுமை தான்! ஆம், பொதுவாக, ஒரே வகை மின்சுமை கொண்ட துகள்கள் ஒன்றை ஒன்று விலக்கும் தன்மை கொண்டது. உதாரணமாக, ஒரு நேர்மின்சுமை துகள், மற்றொரு நேர்மின்சுமை துகளை வலிமையுடன் எதிர்க்கும் (விலக்கும்). ஆனால், உட்கருவினுல் பல நேர்மின்சுமை கொண்ட புரோட்டான்கள் இருந்தாலும், அவை ஒன்றை ஒன்று விலக்குவதில்லை! மாறாக, மிகவும் நெருக்கமாக இருக்கின்றன. இதற்கான விளக்கத்தையும் இத்துறை சார்ந்த விஞ்ஞானிகள் விளக்கியுள்ளனர். இது ஒரு புறம் இருக்க, அணுவின் மற்றுமொரு விந்தை என்னவெனில், அதில் சுழலும் எலக்ட்ரான்கள்!

பொதுவாக, ஒரு பொருள் இயங்கினால், அது அதன் ஆற்றலை இழந்து ஓய்வுநிலைக்கு வருவது இயற்கையான நிகழ்வு. எடுத்துகாட்டாக, இயங்கி கொண்டிருக்கும் வாகனத்தை கருதுவோம். இயக்கத்தின் பொழுது, அவ்வாகனத்தில் இருக்கும் எரிபொருளும் (ஆற்றல்) தீர்ந்து கொண்டே வரும் அல்லவா? தொடர்ந்து இயங்க, அதன் எரிபொருள் முற்றிலும் தீர்ந்து பின்பு ஓய்வு நிலைக்கு திரும்புகிறது. அதாவது, அதன் ஆற்றலை முற்றிலும் இழப்பதால், இயங்கா நிலைக்கு திரும்புகிறது. அதேப்போல், ஒருவர் வட்ட பாதையில் ஓடினாலும் அல்லது தன்னை தானே சுற்றினாலும், சிறிது நேரத்தில் அவர் சோர்வடைவது இயற்கை தானே? ஆனால், இத்தத்துவத்திற்கு முற்றிலும் நேர் எதிரானது எலக்ட்ரான்களின் இயக்கம்! அதாவது, எலக்ட்ரான்கள் தொடர்ந்து சுழன்றாலும், அவைகள் ஆற்றலை இழப்பதே இல்லை! இதற்கு காரணம், அனுமதிக்கப்பட்ட ஆற்றல் நிலை எனப்படும் சுற்றுவட்ட பாதையில் எவ்வித மாற்றமுமின்றி எலக்ட்ரான்கள் தொடர்ந்து சுற்றி வருவதே. (நுண்ணிய) துகள்களான எலக்ட்ரானுக்கே உறித்தான சிறப்பு பண்பு இது.

அணுவின் மற்றுமொரு விந்தை, அதில் உள்ள எதிர்மின்சுமை கொண்ட எலக்ட்ரான்களும், நேர்மின்சுமை கொண்ட புரோட்டான்களும் ஒன்றை ஒன்று ஈர்த்து ஒட்டிக்கொள்வதில்லை! மேலோட்டமாக பார்த்தால், இப்பண்பானது, ‘எதிர் எதிர் மின்சுமை கொண்ட துகள்கள் ஒன்றை ஒன்று ஈர்க்கும்’ என்ற அறிவியல் கோட்பாட்டிற்கு விதிவிளக்கானது. எனினும், இதற்கான அறிவியல் விளக்கமும் கொடுக்கப்பட்டுள்ளது. அதாவது, எலக்ட்ரானுக்கும், புரோட்டானுக்கும் இடையே இருக்கும் ஈர்ப்பு விசையை, மைய நோக்கு விசை சமப்படுத்துவதால், எதிர் எதிர் மின்சுமை கொண்டவையாயினும், அணுவில் உள்ள எலக்ட்ரான், புரோட்டானுடன் சேருவதில்லை. மாறாக, எலக்ட்ரான்கள் வட்டப்பாதையில் உட்கருவை மையமாக கொண்டு சுற்றுவதற்கு இவ்விசைகள் காரணாமாக இருக்கின்றன.

ஆக, நேர்மின்சுமை கொண்ட (புரோட்டான்கள்) உட்கருவின் ஆற்றல், அதனை வட்ட மற்றும் நீள்வட்ட பாதையில், உட்கருவோடு (அதாவது புரோட்டான்களோடு) சேராமல் சுற்றிவரும் எலக்ட்ரான்கள் முதலிய காரணங்களை கொண்டு அணுவின் அமைப்பு விளக்கப்பட்டுள்ளது. முன்னரே பார்த்தது போல், இவ்வணுவின் சாயல், அண்டத்தில் இருக்க வேண்டும் அல்லவா? வாருங்கள், இக்கேள்விக்கான விடையை இனி பார்போம்.

அண்டம் என்பது நம்மைச் சுற்றியுள்ள எல்லாவற்றையும் குறிக்கின்ற ஒரு சொல்லாகும். அதாவது, நாம் வாழும் இந்த பூமி, இதனை சுற்றிவரும் நிலவு, வானம், சூரியன், சூரியனைச் சுற்றி வரும் மற்ற கோள்கள், அதன் துணை கோள்கள், விண் மீன்கள், விண் துகள்கள், இவற்றை எல்லாம் சூழ்ந்துள்ள வெட்ட வெளி முதலியன வெல்லாம், அண்டத்தை குறிப்பனவாகும். பால்வழி திரளான இவ்வண்டத்தில் தான் நாம் வாழும் பூமி உள்ளடங்கிய சூரியக்குடும்பம் அமைந்துள்ளது. அண்டத்தின் ஒரு பகுதி கூறு என்ற அடிப்படையில், சூரிய குடும்பத்தின் அமைப்பை பற்றி இங்கு சுருக்கமாக எடுத்துக்காட்டுகிறேன்.

சூரிய குடும்பத்தின் மையப்பகுதில் அமைந்திருக்கும் சூரியன் ஆற்றல் மிக்கது. காரணம், இதில் உள்ள ஹைட்ரஜன் அணுக்களின் உட்கருக்கள் ஒன்றினைந்து ஹீலியம் அணுக்கருக்களை உண்டாக்கும் வினை ஆகும். அணுக்கரு இணைவு எனப்படும் இவ்வினையின் மூலமாகவே ஆற்றல் தொடர்ந்து வெளியிடப்பட்டு வருகிறது. இங்கு, அணுவின் மையப்பகுதியான உட்கருவினையும் கருதுக. எப்படி, அணுவின் உட்கருவில் புரோட்டான்கள் ஒன்றினைந்து ஆற்றலுடன் இருக்கிறதோ, அதேப்போன்று, சூரியனிலும் ஹைட்ரஜன் உட்கருக்கள் ஒன்றினைவதன் மூலம் ஆற்றல் தொடர்ந்து வெளியிடப்படுகிறது.

மேலும், சூரியனை மையமாக கொண்டு கோள்கள் அனைத்தும் நீள்வட்ட பாதையில் தொடர்ந்து சுற்றிவருகின்றன. அதேநேரத்தில், சூரியனுக்கும் பூமி உள்ளிட்ட மற்ற கோள்களுக்கும் ஈர்ப்பு விசை இருப்பதையும் இங்கு சுட்டி காட்ட விரும்புகிறேன். அப்படியெனில், கோள்கள், சூரியனோடு ஈர்க்கப்பட வேண்டும் அல்லவா? மாறாக, கோள்கள், அணுவில் உள்ள எலக்ட்ரான்களை போன்று தொடர்ந்து சுற்றிக்கொண்டே இருக்கிறது. இதற்கு காரணம், மையநோக்கு விசையே! ஆம், அணுவில் எலக்ட்ரானுக்கும் புரோட்டானுக்கும் இடையே ஈர்ப்பு விசை மற்றும் மைய நோக்கு விசை இருப்பது போன்று, சூரியனுக்கும் கோள்களுக்கும் இடையிலான ஈர்ப்பு விசை, மற்றும் மையநோக்கு விசையால், கோள்கள், சூரியனை தொடர்ந்து வட்ட பாதையில் சுற்றி வருகின்றன.

மேலும், பூமி உள்ளிட்ட கோள்கள் அனைத்தும் சூரியனை தொடர்ந்து சுற்றி வருகின்ற பொழுது, அவைகள் ஆற்றலை இழப்பதாக தெரியவில்லை. ஆற்றலை இழந்தால், கோள்களால் சுழல முடியுமா? எனவே, அணுவில் உள்ள எலக்ட்ரான்களை போன்றே, கோள்களும் தங்களது அனுமதிக்கப்பட்ட பாதையில் தொடர்ந்து ஆற்றலை இழக்காமல் சுற்றி வருகின்றன.

ஆகமொத்தத்தில், அணுவின் உட்கருவை போல், சூரியனும், எலக்ட்ரான்களை போல் கோள்களும், இயங்குவதால், அணுவின் அமைப்பும், அண்டத்தின் ஒரு கூறாகிய சூரிய குடும்பத்தின் அமைப்பும் ஒப்பிட கூடிய நிலையில் இருக்கிறது. அதாவது, அணுவின் சாயல், சூரிய குடும்பத்தில் தெரிகிறது. தவிர, அறிவியலின் கூற்றுப்படி, எல்லா பொருட்களின் அடிப்படை அலகு அணுவாகும். எனவே, அண்டத்திலுள்ள எல்லா பொருட்களின் அடிப்படை அலகும் அணு தானே! எனவே, ‘அண்டங்க ளெல்லா மணுவாக’ என்ற கூற்றில் எத்துனை அறிவியல் உன்மை இருக்கிறது! நவீன அறிவியல் வளர்ச்சி பெறாத அக்காலத்தில் இயற்றப்பட்ட செய்யுள் வரிகளில் ஆழமான அறிவியல் பொதிந்துள்ளதை உணர முடிகிறது.

••••

அண்டக் காட்சியும் கூழ்ம பண்பும் – முனைவர். ஆர். சுரேஷ்

images (19)

ஒரு கரைசலில் இரண்டு பகுதிபொருட்கள் உண்டு. ஒன்று கரைப்பான் (ஒரு பொருளை கரைக்கும் திரவம்). மற்றொன்று கரைபொருள். உதாரணமாக உப்பு நீர் கரைசலை கருதுவோம். இதில் (ஒப்பீட்டளவில் அதிகமான நிறையில்) இருக்கும் நீர், கரைப்பான் ஆகும். (ஒப்பீட்டளவில் குறைந்த நிறையில் இருக்கும்) உப்பு, நீரில் கரைவதால், அதற்கு கரைபொருள் என்று பெயர். இதில் நோக்க வேண்டியது என்னவெனில், திடநிலை பொருளான உப்பு, நீரில் இட்ட உடன், கரைகிறது. கரைந்த உப்பை நம்மால் காண முடியுமா? நிச்சயம் முடியாது. காரணம், கரைந்த ஒரு உப்பு துகளின் அளவு (விட்டம் என கொள்ளலாம்) மிகமிக சிறியது! நமது பார்வை திறனுக்கு, இம்மீச்சிறு அளவுடைய கரைந்த உப்பு தெரியாது. அட நுண்ணோக்கியால் கூட காண இயலாது!

சரி, உப்புக்கு பதிலாக, (சிறிதளவு) மண்ணை (ஒரு குவளை) நீரில் இட்டால், என்னவாகும்? இது என்ன கேள்வி. மண், குவளையின் அடியில் தங்கும் என்று சொல்வது எனக்கு கேட்கிறது. ஆம், புவி ஈர்ப்பு விசையினால், குவைளையின் அடியில் மண் தங்குகிறது. அதே சமயத்தில், மண் துகளினையும் நம்மால் காணமுடிகிறதல்லவா? இதற்கு காரணம், மண் நீரில் கரைவதில்லை. அதனால், மண் துகளின் விட்ட அளவில் எந்த மாற்றமும் இல்லை. நீரில் கரையா பொருளான மண் சேர்ந்த இவ்வகை கலவைக்கு ‘தொங்கல்’ என்று பெயர்.

மேற்கண்ட உதாரணங்களுக்கு மாறாக, மற்றுமொரு வகை கரைசல் உண்டு. அதற்கு ‘கூழ்ம கரைசல்’ என்று பெயர். அக்கரைசலின் வகைக்கு சிறந்த எடுத்துகாட்டு பால் ஆகும். சத்து மிக்க பாலில், (இயற்கையாகவே அதிக அளவு) நீரும், கொழுப்பு உள்ளிட்ட பிற சத்துக்களும் இருக்கின்றன. இதில் நீர் கரைப்பானாக செயல்படுகிறது. (திடநிலை) கொழுப்பு உள்ளிட்ட பிற சத்துபொருட்கள் கரைபொருளாக இருக்கின்றன. (உப்பு) கரைசலுக்கும் கூழ்ம கரைசலான பாலிற்கும் உள்ள வேறுபாடு, அதிலுல்ல கரைபொருளின் ‘விட்ட அளவு’ தான். அதாவது, கரைந்த உப்பு துகளின் விட்டத்தை காட்டிலும், பாலில் உள்ள கொழுப்பு துகளின் விட்டம் மைக்ரோமீட்டர் அளவுடையது. அதாவது, நுண்ணூக்கியின் வழியே, கரைபொருளை காண முடியும். ஆனால் வெரும் கண்ணால் காண முடியாது.

நமது அன்றாட வாழ்வில், பல வகைகளில் பயன்படுத்தப்படும் கூழ்ம கரைசலுக்கென தனித்த பண்புகள் உண்டு. அதில் ஒன்று தான், அவற்றின் ஒளியியல் பண்பு. அதாவது, கூழ்ம கரைசலின் ஊடே, ஒளியை செலுத்தும் பொழுது, அதில் ஏற்படும் மாற்றமாக கருதலாம். இப்பண்பினை பற்றி காண்பதற்கு முன்னர், மாணிக்கவாசகர் அருளிய ஒரு வாசகத்திற்கு உருகா திருவாசகத்திலிருந்து சில வரிகளை காண்போம்.

அண்டப் பகுதியின் உண்டைப் பிறக்கம்
அளப்பருந் தன்மை வளப்பெருங் காட்சி
ஒன்றனுக் கொன்று நின்றெழில் பகரின்
நூற்றொரு கோடியுன் மேற்பட விரிந்தன
இன்னுழை கதிரின் துன்அணுப் புரைய (திருவாசகம், திருவண்டப் பகுதி, 1 முதல் 5 வரிகள்).

மேற்கண்ட விரிகளில், ஐந்தாம் வரியின் விளக்கத்தை மட்டும் காண்போம்.

இறைவனின் பார்வைக்கு, அண்டத்தில் (universe) மிதக்கும் கோல்களின் காட்சியை, நமக்கு உணர்த்த, மாணிக்கவாசகர் சொல்லும் ஒரு உதாராணமாக மேற்கண்ட ஐந்தாம் வரி அமைந்துள்ளது. சரி, இதன் விளக்கத்தை தற்போது காணலாம்.

வீட்டில் இருக்கும் ஒரு சிறிய துவாரத்தின் வழியே வருகின்ற கதிரவன் ஒளியில் அணுப்போன்ற துகள்கள் (அதாவது தூசிகள்) அலைந்து திரிவது நம் ஊனக் கண்ணுக்கும் தென்படுகின்றன.

சரி, அண்டக்காட்சியை விளக்கும் மாணிக்கவாசரின் இவ்வரிக்கும், கூழ்ம கரைசலின் ஒளியியல் பண்பிற்கும் என்ன சம்பந்தம்? என கேட்கலாம். ஒற்றுமை இருக்கிறது. வாருங்கள், அறிவியல் நோக்கில் உள்ள அடிப்படை ஒற்றுமையை காண்போம்.

முன்னதாக, சூரிய ஒளியில், குறிப்பாக, வீட்டின் சிறு துவாரத்தின் வழியே வரும் சூரியஒளியில் தூசிகள் தெரிவதற்கான காரணத்தை பார்க்கலாம்.

சாதாரணமாக, வீட்டில் இருக்கும் (பகல்பொழுதில் இருக்கும் இயற்கையான) வெளிச்சத்தில், தூசியினை காணமுடிவதில்லை. இதற்கு காரணம், விரவிய நிலையில் உள்ள இயற்கையான வெளிச்சம் (அதாவது சூரியஒளி), மீச்சிறு அளவுடைய தூசியின் மீது பட்டு எதிரொளிக்காமல், விலகி செல்கிறது. ஒரு பொருளின் மீது ஒளி பட்டு பிரதிபலித்தால் மட்டுமே, நாம் அப்பொருளை காண முடியும். எடுத்துக்காட்டாக, நம் முன்னே வைக்கப்பட்ட மிகப்பெரிய (முற்றிலும்) தூய்மையான கண்ணாடியை சட்டெனெ இனங்காண முடிவதில்லை. ஏனெனில், ஒளியானது கண்ணாடி வழியே ஊடுருவி சென்றுவிடுகிறது. அதாவது, கண்ணாடி ஒளியை பிரதிபலிப்பதில்லை. மேலும், இருட்டிலும், நம்மால் பொருட்களை தெளிவாக காண முடிவதில்லை. காரணம், பொருட்கள் பிரதிபலிப்பதற்குண்டான ஒளி, அங்கு இல்லை. ஆக, ஒரு பொருள் தெரிய (நம் கண்ணிற்கு) வேண்டுமெனில், அப்பொருள் ஒளியை எதிரொலிக்க வேண்டியது ஒரு அம்சம் ஆகும். இதன் அடிப்படையில், விரவிய ஒளியை, தூசி பிரிதிபலிக்காததால், நம்முடைய கண்ணுக்கு அவைகள் தெரிவதில்லை.

ஆனால், ஒரு சிறு துவாரத்தின் வழியே வரும் சூரிய ஒளியில், தூசிகள் கண்ணுக்கு தெரிகின்றது. ஏனெனில், துவாரத்தின் வழியே வரும் சூரியகதிர், ஒளிகற்றையாக (beam of light) வந்து தூசியில் படும்பொழுது, அக்கதிரானது சிதறடிப்படுகிறது. இதனை ஒளிச்சிதறல் (light scattering) என்கின்றனர்.

ஒளிச்சிதறல் என்பது பிரதிபலித்தல் என்ற நிகழ்விலிருந்து மாறுபட்டது. ஆம், ஒளிச்சிதறலில் இரண்டு முக்கிய நிகழ்வுகள் உண்டு. முதலில் தூசியானது, ஒளியை உள்வாங்க வேண்டும். இதனை ‘உறிஞ்சிதல்‘ என்கின்றனர். பின்னர், உறிஞ்சிய ஒளியை ‘எல்ல திசைகளிலும் வெளியிடுதல்‘. இவ்விரண்டு படிநிலைகளையும் உள்ளடக்கியதே ஒளிச்சிதறல்.

ஆக, தூசித்துகள்களின் வழியே ஒளிக்கறையை செலுத்தினால், ஒளிச்சிதறலின் காரணமாக, அத்தூசிகள் நமது கண்ணுக்கு தெரிகிறது. இதேப்போன்ற பண்பு, கூழ்ம கரைசலுக்கும் உண்டு. ஆம், பாலின் வழியே, ஒளிக்கறையை (டார்ச் லைட் மூலம்) செலுத்தினால், (ஒளிச்சிதறலினால்) அதிலுள்ள கொழுப்பு துகள்களை (முழுமையாக அல்ல) காண முடியும். பத்தொன்பதாம் நூற்றாண்டில் வாழ்ந்த தலைசிறந்த விஞ்ஞானிகளுல் ஒருவரான, ஜான் டிண்டால் (John Tyndall) தான் இவ்விளைவினை முதன்முதலில் விளக்கியவர். எனவே, இவ்விளைவிற்கு ‘டிண்டால் விளைவு’ என்று பெயர்.

சரி, டிண்டால் விளைவு கூழ்ம கரைசலுக்கே உரித்தான் பண்பு. இது எப்படி, காற்றில் மிதக்கும் தூசிகளுக்கும் பொருந்துகிறது? இக்கேள்விக்கு, அறிவியலாளர்களின் பதிலை காண்போம் வாங்க.

உண்மையில் வளிமண்டலம் எனபதே, ஒருவகை கூழ்ம கரைசல் தான். அதாவது காற்றானது கரைப்பானாகவும், அதில் கலந்திருக்கும் தூசி துகள்கள் கரைபொருளாகவும் செயல்படுகின்றன. இக்கலவையை காற்று கரைசல் (aerosol) என்கின்றனர். எனவே, டிண்டால் விளைவு, வளிமண்டலத்திகும் மிகச்சிறப்பாக பொருந்தும்.

இதற்கிடையில் கூழ்ம கரைசலின் மற்றுமொரு பண்பான பிரவுனியன் இயக்கம் (Brownian motion) பற்றியும் இங்கு குறிப்பிட விழைகிறேன். நுண்ணோக்கியின் மூலம், கூழ்ம கரைசலை காணும் பொழுது, அதிலுள்ள கூழ்ம துகள்கள் ஓரிடத்தில் நிலையாக இருப்பதில்லை. அதாவது, அவைகள் தொடர்ந்து அங்கும் இங்குமாக அலைந்து திரிகின்றன. கூழ்ம கரைசலின் இப்பண்பினை, பதினெட்டாம் நூற்றாண்டில் வாழ்ந்த இராபர்ட் பிரவுன் (Robert Brown) எனும் தாவரவியல் அறிஞரால் முதன் முதலில் கண்டுபிடிக்கப்பட்டது.

மேற்கண்ட திருவாசக வரியின் விளக்கத்தில் பார்த்தது போல், காற்றில் மிதக்கும் தூசியானது அலைந்து திரிகின்றனவாக இருக்கிறது. இது ஆய்வின் முலம் நிரூபிக்கப்பட்ட பிரவுனியன் இயக்கத்துடன் ஒத்துபோகிறது அல்லவா? எனவே, டிண்டால் விளைவு போன்று, பிரவுனியன் இயக்கமும், இன்னுழை கதிரின் துன்அணுப் புரைய எனும் வரிக்கு கச்சிதமாக பொருந்துகிறது.

குறிப்பிட வேண்டியது என்னவெனில், கிட்டதட்ட பதினெட்டு மற்றும் பத்தொன்பதாம் நூற்றாண்டில் கண்டறியப்பட்ட இவ்வறிவியல் விளக்கத்தின் அடிப்படையை, மாணிக்கவாசகர் அருளிய திருவாசகத்தில் காண முடிகிறது என்பது தான். அபாரமான ஞானம் கொண்ட நம் மூதாதயர்கள் அருளிய நூல்களிலிருந்து ஆன்மீக உண்மைகளோடு, அறிவியல் உண்மைகளையும் அறியமுடிகிறது.

ஒளவையின் இலவம் பஞ்சு அறிவியல் முனைவர். ஆர். / சுரேஷ் கன்செப்ஷன் பல்கலைக்கழகம், சிலி

download (5)

நம் மனம் அல்லது உடலானது, அதிக உழைப்பின் நிமித்தம் சோர்வடையும் பச்சத்தில் உறக்கம் நம்மை தானாக தழுவுகிறது. இத்தருனத்தில், நாம் உடலளவில் எந்த வேலையையும் செய்வதில்லை. இருப்பினும், உறக்கத்தின் பொழுது, பல மிகமுக்கிய உடற்செயல்கள் நம் உடலில் நிகழ்வதாக நிபுணர்கள் தெரிவிக்கின்றனர். ஆம், ஞபகத்திறனை ஒருங்கினைத்து நம்முள் சேர்த்து வைப்பதில் உறக்கம் முக்கிய பங்கு வகிக்கிறதாம். அதாவது, பகல் பொழுதில் நாம் பார்க்கும், கற்கும், உணரும், பலவற்றை, உறங்கும் பொழுது நம் உடல் தகவல்களாக தொகுத்து, வகுத்து நம் மூலையில் பதிவேற்றம் செய்கிறதாம். அளவான உறக்கம் நம்முடைய கல்வி மற்றும் ஞாபகத்திறனை சிறப்பாக்குவதாக ஆய்வாளர்கள் கூறுகின்றனர். மேலும், தசை வளர்ச்சிக்கும், திசுக்கள் சீரமைப்பிற்கும், முக்கியமான ஹார்மோன்கள் உருவாக்கப்படுவதற்கும் போதுமான கால அளவு உறக்கம் மிகமிக இன்றியமையாதது. வாழ்வின் அங்கமான, இச்செயலை எப்படி செய்ய வேண்டும்? எல்லவற்றையும் வகுத்து சென்றுள்ள நம் முன்னோர்கள் இதற்கு வழிமுறை சொல்லாமல் இருப்பாரோ? வாருங்கள் பார்ப்போம்.

எப்படி உறங்க வேண்டும்? என்பதை பின்வருமாறு சொல்லியிருக்கிறார் நம் ஒளவை பாட்டி.

இலவம் பஞ்சில் துயில் (ஆத்திச்சூடி, உயிர்மெய் வருக்கம், 26)

இதன் விளக்கம் பின்வருமாறு. ‘இலவம் பஞ்சு‘ எனும் ஒருவகை இயற்கை பஞ்சினால் செய்யப்பட்ட படுக்கையில் உறங்க வேண்டும். உறங்குவதற்கு கோரை பாய், கயிற்று கட்டில் உள்ளிட்ட எத்தனையோ முறை இருந்த பொழுதும், இலவம் பஞ்சு படுக்கையில் உறங்க சொன்னதர்கு காரணம் என்ன? பருத்தி இழைகளும் மிருதுவானவைகளே! ஆயினும், பருத்தியை சொல்லாமல், இலவம் பஞ்சை குறிப்பிட்டு சொன்னதர்க்கு காரணம் என்ன? சொன்னது ஒளவை ஆயிற்றே! காரணம் இல்லாமல் இருக்குமா? வாருங்கள், இன்றைய அறிவியல் உலகம் இலவம் பஞ்சு பற்றி என்ன சொல்கிறது என்பதை பார்ப்போம்.

இலவம் பஞ்சானது, ‘இலவு‘ எனும் வெப்ப மண்டலத்துக்குறிய மரத்திலிருந்து கிடைக்கும் பொருளாகும். இலவு மரம் காய்த்தாலும், கணிக்காது. காரணம், காய் நெற்றாகி (முதிர்ந்து காய்ந்த காய்) இலவம் பஞ்சினை தந்துவிடும். இது, மென்மை (பருத்தியை விட), வழுக்கும் தன்மை, சுருங்கா தன்மை, உயிரி சிதைவு அடைதல், மிகக்குறைந்த ஒவ்வாதன்மை மற்றும் குறைந்த எடை (பருத்தியை விட சுமார் எட்டு மடங்கு குறைந்தது) உள்ளிட்ட பல சாதகமான பண்புகளை பெற்றிருக்கிறது. இப்பஞ்சினால் செய்யப்பட்ட தலையணிகள் மற்றும் மெத்தைகளின் பயன்களை ஒவ்வென்றாக பார்க்கலாம்.

இயற்கையாக வலரும் இலவு மரத்திலிருந்து கிடைக்கும் இலவம் பஞ்சினை எடுத்து நேரடியாக தலையணைகளோ அல்லது படுக்கை மெத்தைகளையோ செய்ய முடியும். செயற்கை பஞ்சு இழைகளை போல், எந்தவித வேதிமாற்றத்திற்கும், இலவம் பஞ்சினை உட்படுத்த வேண்டிய அவசியம் இல்லை. செயற்கை பஞ்சுகளை காட்டிலும், இயற்கையான இலவம் பஞ்சு நம் உடலுக்கு நல்லது தானே?

அடுத்து இலவம் பஞ்சின் மருத்துவ குணத்தை பற்றி குறிப்பிட வேண்டும். இப்பஞ்சானது அதிக அளவு செல்லுலோஸ், பென்டோஸ் மற்றும் லிகினின் எனும் வேதிபொருட்களால் கட்டமைக்கப்பட்டுள்ளது. குறிப்பாக, லிகினின் எனும் வேதிபொருளால், பூச்சிகள், இலவம் பஞ்சினை அண்டுவதில்லையாம். மெழுகு தன்மை கொண்ட பொருளின் நிமித்தம், இலவம் பஞ்சு நீர் ஒட்டா தன்மையை பெற்றிருக்கிறது. இதனால், பூஞ்சைகளும் இலவம் பஞ்சினை தாக்குவதில்லை என்கின்றனர் ஆராய்ச்சியாளர்கள். மேலும், அழுக்குகளும் இவற்றுடன் ஒட்டுவதில்லை. ஒருவேளை அழுக்கு படிந்தாலும், அவற்றை எளிதில் துடைத்து விடலாம். தவிர, இலவம் பஞ்சு எதிர் நுண்ணுயிர் (பாக்டீரியா) பண்பினை பெற்றிருப்பதாகவும் கண்டறியப்பட்டுள்ளது. அதாவது, தீங்கிழைக்கும் பாக்டீரியாங்களை கொல்லும் திறனை இலவம் பஞ்சு பெற்றிருக்கிறது. இதனால், பாக்டீரியாங்கள் எதுவும், இவற்றில் வளருவதில்லை. எனவே, நமக்கு நோய் வராமல் தடுப்பதுடன், ஒரு சில உடல் உபாதைகளான, தலைவலி, கழுத்துவலி, தசைபிடித்தம், மன அழுத்தம் உள்ளிட்டவைகளும் குணமாவதாக கூறப்படுகிறது. எனவே, இலவம் பஞ்சினாலான படுக்கையானது, மருத்துவ ரீதியிலும் மிக சிறந்தது.

இலவம் பஞ்சின் மிருதுவான தன்மையும் நமக்கு நன்மையே! பொதுவாக, நல்ல உடல் ஆரோக்கியத்திற்கு நேர்த்தியான தூக்கம் அவசியம். அதாவது, உறங்கும் பொழுது, தலை, கழுத்து மற்றும் முதுகெலும்பு உள்ளிட்ட உடற் பாகங்கள் சமதளத்தில் இருப்பது அவசியம். இலவம் பஞ்சு படுக்கையில் இது சாத்தியம் என்கின்றனர் அறிஞர்கள். இலவம் பஞ்சு மிகவும் மிருதுவாக இருப்பதால், உறங்கும் நிலைகளில், நமது உடலுக்கு தகுந்த பாதுகாப்பை தருவதால், நேர்த்தியான உறக்கத்தை நம்மால் பெறமுடிகிறது.

இலவம் பஞ்சு இழைகள், உள்ளீடற்ற அமைப்பை (உதாரணம்: குழாய்கள்) பெற்றுள்ளன. இதன் காரணமாக, இது ஒலியை நன்கு உறிஞ்சும் தன்மை கொண்டவையாக விளங்குகின்றன.

இலவம் பஞ்சு படுக்கைகளை நீண்ட நாட்களுக்கு பயன்படுத்த முடியும். நீர் ஒட்டா தன்மையால், இலவம் பஞ்சு படுக்கைகளை நீரில் துவைத்து சூரிய ஒளியில் உளர்த்தி கொள்வதும் எளிது.

குறிப்பாக, கோடைகாலத்தில் இலவம் பஞ்சு படுக்கைகளையே கட்டாயம் பயன்படுத்த வேண்டும் என்கின்றனர் இத்துறை வல்லுனர்கள். காரணம், இலவம் பஞ்சு உடல் சூட்டை உறிஞ்சிக் கொள்கிறது. இதனால், உஷ்ண நோய்கள் தடுக்கப்படுகின்றன.

இயற்கையாக கிடைக்கும் பொருள் என்பதால், இறுதியில் இலவம் பஞ்சினை சூழ்நிலையில் வெளியேற்றினாலும், எந்தவித சுற்றுசூழல் பாதிப்பும் ஏற்படுவதில்லை.

மேற்கண்ட நன்மைகளால், இலவம் பஞ்சினாலான படுக்கைகளை பயன்படுத்தும்படி அறிவுருத்துகிறது இன்றய நவீன அறிவியல் உலகம்.

சரி, இலவம் பஞ்சை காட்டிலும், பருத்தி இழைகள், படுக்கைகள் செய்வதற்கு ஏற்றதா? என்ன சொல்கிறது அறிவியல்? பார்ப்போம்.

ஏற்கனவே, பார்த்தார் போல், பருத்தியைவிட, மிக்குறைந்த எடை, மற்றும் மிருதுவானது இலவம் பஞ்சு. இலவம் பஞ்சு போன்றே, பருத்தியும், உயிரி சிதைவு அடையும் என்றாலும், நீர் உறிஞ்சும் பண்பின் காரணமாக, பருத்தியினாலான படுக்கைகள் எளிதில் அழுக்காகும் வாய்ப்பு உண்டு. மேலும், பூஞ்சைகள் மற்றும் பாக்டீரியாங்கள் உள்ளிட்ட தீங்கிழைக்கும் காரணிகள், எளிதில் தாக்கும் நிலையும் உண்டாகிறது. இதனால், பருத்தியினாலான படுக்கைகளை அடிக்கடி துவைத்தல் வேண்டும். எனவே, இலவம் பஞ்சை காட்டிலும் பருத்தியின் (படுக்கை பொருளாக) பயன்பாட்டு காலம் குறைவு. இக்காரணங்களால், பருத்தியை காட்டிலும், இலவம் பஞ்சே படுக்கைகள் செய்வதற்கு ஏற்றதாக சொல்லப்படுகிறது.

ஆத்திச்சூடி இயற்றிய ஒளவை சோழர் காலத்தில் வாழ்ந்ததாக நம்பப்படுகிறது. அதாவது, பன்னிரெண்டாம் நூற்றாண்டை குறிக்கிறது. இன்றைய அறிவியல் உலகம் ஆராய்ந்து அறிவிப்பதை, நவீன அறிவியல் வளர்ச்சி அடையாத அக்காலத்திலேயே, ஒளவை பாட்டி, இதனை உணர்ந்து நமக்கு அறிவுறுத்தியிருப்பது வியக்க தக்கதாக உள்ளது.

•••

சொல் ஆற்றல் / முனைவர். ஆர். சுரேஷ் / கன்செப்ஷன் பல்கலைக்கழகம், சிலி

images

எவ்வொறு செயலை (வினையை) செய்வதற்கும் ஆற்றலானது அவசியம். எடுத்துக்காட்டாக, நடத்தல், பார்த்தல், பேசுதல், விளையாடுதல், தூங்குதல், வரைதல், படித்தல், உள்ளிட்ட எல்லா வினைகளுக்கும் ஆற்றல் வேண்டும். இவ்வினைகளுக்கான ஆற்றலை ‘உணவு’ என்கிற வேதியாற்றலில் இருந்து நாம் பெருகிறோம். விலங்குகளும் உணவின் மூலமே, தனது ஆற்றல் தேவையை பூர்த்தி செய்து கொள்கின்றன.

சரி, நமக்கும், விலங்குகளுக்கும் உணவளிக்கும் தாவரங்கள் எப்படி ஆற்றலை பெருகின்றன? சூரிய ஒளி மூலம் தான்! ஆம், சூரிய ஒளியின் முன்னிலையில் கரியமில வாயுவும் நீரும் சேர்ந்து கார்போஹைட்ரேட்டான உணவினை தாவரங்கள் தயாரிக்கின்றன. இவ்வினைக்கு பச்சையம் (தாவரத்தில் இருக்கும் பச்சை நிறமி) இன்றியமையாதது.

உயிரினங்களான தாவரங்களுக்கும், மனிதர்களுக்கும், விலங்குகளுக்கும் ஆற்றல் தேவைப்படுகிறது. இதேப்போன்று உயிரற்றவைகளுக்கும் ஆற்றல் தேவைப்படுமா? என்றால், ஆம், என்ற பதிலே கிடைக்கிறது. நகரும் உயிரில்ல பொருளை நகர்த்துவதற்கும், நிலபரப்பிலிருந்து மேலே உயர்துவதற்கும் ஆற்றல் அவசியம். இது மின்னாற்றல் மற்றும் வேதியாற்றல் மூலமாக பூர்த்தி செய்யப்படுகிறது.

ஒளியாற்றல், வேதியாற்றல், மற்றும் மின்னாற்றலை தவிர வெப்ப ஆற்றலும், ஒலியாற்றலும் நம் அன்றாட வாழ்வில் நீக்க முடியா ஆற்றல் மூலங்காளாகும்.

இங்கு குறிப்பிட வேண்டியது என்னவெனில், வினையை பொறுத்து ஆற்றலின் அளவும், மூலமும் மாறும் என்பதே. நாம், ஒரு செயலை செய்வதற்கு தேவையான அளவைவிட அதிகப்படியான ஆற்றலை கொடுத்தால் என்ன நிகழும்? இரண்டு விளைவுகளுக்கு வாய்ப்புண்டு. ஒன்று, அதிகப்படியான ஆற்றல் வீணாக்கப்படுகிறது. இதற்கு உதாரணமாக, தொடர்ந்து சுழலும் மின்விசிறியை சொல்லலாம். அதாவது தொடர்ந்து மின்சாரத்தை கொடுத்தாலும், மின்விசிறி ஒரு குறிப்பிட்ட சதவிகித மின்னாற்றலை மட்டும் சுழலுவதற்கு பயன்படுத்துகிறது. அதிகப்படியான மின்னாற்றலை வெப்ப ஆற்றலாக மாற்றி வெளியேற்றுகிறது.

மற்றொரு விளைவு? மிதமிஞ்சிய ஆற்றலானது, அச்செயலை செய்யும் பொருளையே தாக்கலாம்! வரையறையை மீறி அளிக்கப்படும் மின்னழுத்தம், சிலவகை வீட்டு உபயோக மின்சாதனங்களை செயலிழக்கச் செய்வதை அனைவரும் அறிவோம். எனவே, ஆற்றலை அளவுக்கு மீறி பயன்படுத்தினால், விரும்பத்தாகாத விளைவுகள் உண்டாகும். இவ்விளைவு, மனிதர்களுக்கு பொருந்துமா? என்ற வினா எழுகிறது. இதற்கான விடையாக திருவள்ளுவரின் குறளை பதிலாக அளிக்க விரும்புகிறேன்.

தீயினாற் சுட்டபுண் உள்ளாறும் ஆறாதே
நாவினாற் சுட்ட வடு (குறள் 129)

இக்குறளுக்கான விளக்கம்: ஒருவனை ஒருவன் தீயினால் சுட்ட புண் உடம்பிலே இருப்பினும், அவன் உள்ளத்தில் ஆறிவிடும். ஆனால் ஒருவனை ஒருவன் தன் நாவினால் சுட்டால் (கடுஞ்சொல் மூலமாக) அது பாதிக்கப்பட்டவனது உள்ளத்தில் ஆறாமல் மாறா வடுவாய் இருக்கும். இக்குறளில், தீயினை சொல்லுடன் ஒப்பிடுகிறார் திருவள்ளுவர். இதை அறிவியல் கண்ணோட்டத்தில் பார்த்தால், ‘தீ’ என்ற வெப்ப ஆற்றலோடு, (ஒலி வடிவ) ’சொல்‘ என்ற ஒலியாற்றலுடன் ஒப்பிடப்பட்டிருப்பதை உணர முடிகிறது. இவ்விருவகை ஆற்றலையும் அளவிற்கு அதிகமாக பயன்படுத்துவதால் தீமையே விளைகிறது. இதனை சற்று விரிவாக பார்ப்போம்.

உண்மையில் சீரான உடற்செயலியல் நிகழ்வுகளுக்கு வெப்ப ஆற்றல் அவசியம். இதனை நுப்பத்தி ஏழு டிகிரி செல்சியஸ் (சராசரி அளவு) என்று கண்டறிந்துள்ளது அறிவியல் உலகம். இச்சராசரி வெப்பமானது, உடலில் புகுந்த நுண்ணுயிரிகளினால் அதிகரிக்கப்பட்டால், நமக்கு கேடு உண்டாகிறது. வெளியிலிருந்து தீயினால் (சுடப்பட்டால்) கொடுக்கப்பட்டால் (உடலிற்கு)அழிவு உண்டாகிறது. இதேப்போன்று, தொடர்பு கொள்வதற்கு சொற்கள் அவசியம். நம் நாவின் இனிய சொற்கள் பிறருக்கு மகிழ்வை உண்டு பன்னும். தீய சொற்களோ, தீயை போல் சுடும். இதிலிருந்து அறிவது என்னவெனில், உயிரற்ற பொருட்களை போன்றே, உயிரினத்திற்கும் அதிகப்படியான ஆற்றலை கொடுக்க, தீமையே விளையும். இதைதான்,

அதிக படிப்பு உடலுக்கு இளைப்பு என்றனரோ? (பழமொழி)

தற்போது, அறிவியல் நோக்கில் தீயினை சொல்லோடு (ஒலி வடிவம்) ஒப்பிட முடியுமா? என்பதை ஆராய்வோம், வாருங்கள்.

முதலில் தீயினை பற்றி காணலாம். தீ மூட்டும் பொழுது, வெப்பம் உயருகிறது. இதிலிருந்து வெப்ப ஆற்றல் வெளிப்படுகிறது. வெப்ப ஆற்றலை பயன்படுத்தி இயற்பியல் மாற்றங்களை (வினைகளை) நிகழ்த்த முடியும். உதாரணமாக, திரவ நிலை நீரினை சுமார் நூறு டிகிரி செல்சியஸ் வெப்பநிலைக்கு சூடுபடுத்தும் பொழுது வாயு நிலை நீராக மாறுகிறது. சூடுபடுத்துவதால், நீரின் நிலை (திரவ நிலையிலிருந்து வாயு நிலைக்கு) மட்டுமே மாறுகிறது. விளைபொருளில் (வினை முடிந்தபின் கிடைப்பது) மாற்றம் இல்லை. அதாவது, சூடுபடுத்துவதற்கு முன்னும், பின்னும், இருப்பது நீர் மட்டுமே. எனவே இதனை இயற்பியல் மாற்றம் என்கிறோம்.

தவிர, வேதியியல் வினைகளை நிகழ்த்தவும் வெப்ப ஆற்றல் பயன்படுகிறது. உதாரணமாக, காய்ந்த மரக்கட்டை எரியும் வினையை கருதலாம். காய்ந்த மரக்கட்டையில் கார்போஹட்ரேட் இருக்கிறது. இதனை காற்று வெளியில் எரிக்கும் பொழுது ஆக்சிஜனுடன் சேர்ந்து நீராகவும், கரியமில வாயுவாகவும் (விளைபொருட்கள்) மாறுகிறது. இத்துடன், வெப்பமும், ஒளியும் உண்டாகிறது. இவ்வினை முடிந்த பின்னர் எரிக்கப்படாத கார்போஹைட்ரேட்டு கருகி சாம்பலாக மிஞ்சுகிறது. எரித்தல் வினைக்கு பின் புதிய விளைபொருள் கிடைப்பதால், இதனை வேதிவினை என்கிறோம். எனவே, வெப்ப ஆற்றல் இயற்பியல் மற்றும் வேதியியல் வினைகளை நிகழ்த்த பயன்படுகிறது.

வெப்ப ஆற்றலுடன் ஒப்பிடபட்ட ஒலி ஆற்றலால், இயற்பியல் மாற்றங்களையும், வேதியியல் வினைகளையும் நிகழ்த்த முடியுமா? என்ற வினாவிற்கு பதில் முடியும் என்பதே! முதலில் ஒலி ஆற்றலால் (இங்கு பேசும் சொற்களை குறிக்கவில்லை) நிகழும் இயற்பியல் மாற்றத்திற்கான எடுத்துகாட்டினை பார்போம். சில வகை காய்கறிகள், பழங்கள், மீன் உள்ளிட்ட உணவு பொருட்கள் கெடாமல் பாதுகப்பதற்கு உப்பு (சோடியம் குலோரைட்) நீர் கரைசல் பதப்படுத்தியாக பயன்படுத்தப்படுகிறது. இவ்வுப்பு கரைசலை உருவக்கிட ஒலி ஆற்றல் பயன்படுத்தப்படுகிறது. பொதுவாக, உப்பு, நீரில் கரையும் என்றபொழுதும், ஒலி ஆற்றலை பயன்படுத்தும் பொழுது நேர்த்தியான உப்பு கரைசல் கிடைக்கிறது. எனவே, வெப்ப ஆற்றலை போன்றே, ஒலி ஆற்றலையும் இயற்பு மாற்றத்தினை நிகழ்த்துவதற்கு பயன்படுத்தலாம்.

மேலும், ஒலி ஆற்றலை பயன்படுத்தி வேதிவினைகளும் நிகழ்த்தப்படுகின்றன. அவைகளுக்கு ஒலிவினைகள் என்று பெயர். உதாரணமாக, சாயக்கழிவு நீர் சுத்திகரிப்பு முறையில், ஒலி ஆற்றல் (20–1000 kHz) பயன்படுகிறது. அதாவது, நீரில் இருக்கும் சாயங்களை அழிக்க ஒலி ஆற்றலை பயன்படுத்தலாம். இது எப்படி சாத்தியமாகிறது? சுருக்கமாக பார்ப்போம்.

போதுமான அதிர்வெண் (ஒரு வினாடியில் தோற்றுவிக்கப்படும் அலைகளின் எண்ணிக்கை) கொண்ட ஒலி ஆற்றலை, சாயங்கலந்த கழிவு நீரில் செலுத்தும் பொழுது, ஆற்றல் மிக்க ஹைட்ராக்ஸைடு தனித்த உறுப்புகள் (OH•) உண்டாக்கப்படுகின்றன. இத்தனித்த உறுப்புகள், சாயங்களை கரியமில வாயுவாகவும், நீராகவும் சிதைக்கிறது. இதன் மூலம் சாயப்பட்டரை கழிவு நீர் தூய்மையாக்கப்படுகிறது. இதே முறையில் கழிவு நீரில் இருக்கும் தீங்கிழைக்கும் நுண்ணுயிரிகளையும் அழிக்க முடியும் என்பதை விஞ்ஞானிகள் கண்டறிந்துள்ளனர். மேலும் நடைமுறையில் பயன்படுத்தப்படும் குலோரின் சேர்மங்களுக்கு சிறந்த மாற்றாகவும் ஒலிவினையூக்க முறை கருதப்படுகிறது.

மேற்கண்ட செய்திகள் மூலம், வெப்ப ஆற்றலும், ஒலியாற்றலும் வினைகளுக்கு பயன்படுவது சத்தியம் என்பதை பார்த்தோம். எனவே, வள்ளுவரின் ’தீயிற்கும் சொல்லிற்குமான (ஒலி என கொள்க) ஒப்பீடு அறிவியில் பார்வையிலும் மிக பொருத்தமாக இருப்பது கண்கூடு.

ஒலியாற்றலை வினைகளுக்கு பயன்படுத்துவதை அறிந்த பொழுதும், (ஒலி வடிவ) சொற்களே வினைகளை நிகழ்த்துமா? என்ற வினாவும் எழுகிறது. இதற்கான பதிலை பார்பதற்கு முன்னதாக, திருவள்ளுவரின் மற்றொரு குறளை (குறள் 642) காண்போம்.

ஆக்கமுங் கேடும் அதனால் வருதலால்
காத்தோம்பல் சொல்லின்கட் சோர்வு.

இக்குறளுக்கான விளக்கம் பின்வருமாறு. ஆக்கமும் கேடும் சொல்லுகின்ற சொல்லால் வருவதால் ஒருவன் தன்னுடைய சொல்லிற்கு தவறு நேராமல் காத்துக்கொள்ள வேண்டும்.

’ஆக்கமும் கேடும்’ அதாவது நன்மையும் தீமையும் நம்முடைய சொற்களினால் வரும் என்றுரைக்கிறார் திருவள்ளுவர். நன்மை அல்லது தீமையானது ஒரு செயலினால் விளைவது. செயல் என்பது வினையே! எனவே, சொல்லின் மூலம் நிகழ்வது செயல். இச்செயலின் விளைவு நன்மை அல்லது தீமை. ஆக சொற்கள் (உயிரினத்தில்) வினையை நிகழ்த்தும் என்பது தெளிவு. மேலும், அனைவரும் அறிந்த பழமொழியை இங்கு சொல்ல விரும்புகிறேன்.

பாம்பென்றால் படையும் நடுங்கும் (பழமொழி)

’பாம்பு’ என்ற ஒலிவடிவ சொல்லே, ’நடுக்கம்’ என்ற செயலை நிகழ்த்துகிறது. மேலும், நம் அன்றாட வாழ்விலும், சொற்கள் செயலை நிகழ்த்துகின்றன. ஆம், நம்முடைய சொற்களால் பிறரை செயல்பட வைப்பதும், பிறரின் சொற்களால் நாம் செயல்படுவதும் வழக்கம் தானே? சொற்களால் நம் அன்றாட வாழ்வில் செயல்கள் நிகழும் பொழுது, இயற்பு அல்லது வேதிவினைகளை நிகழ்த்தாமல் இருக்க முடியுமா? இதுவரையிலும் சொற்களை கொண்டு வினைகளை ஆய்வகத்தில் நிகழ்த்தியிருக்கிறார்களா? இக்கேள்விக்கான விடையை பார்ப்போம்.

பொதுவாக ஒரு வேதிவினை நிகழ வேண்டுமெனில், ஆற்றல் தேவை என்பதை அறிவோம். மேலும், கொடுக்கப்படும் ஆற்றலை அதில் ஈடுபடும் வினைபடு பொருட்கள் எடுத்துக்கொண்டு வினையை நிகழ்த்துகின்றன. உதாரணமாக மரக்கட்டையை எரிக்கும் பொழுது வினை நிகழுகிறது. அதாவது மரக்கட்டை எரிந்து சாம்பலாகிறது. இதுவே, ஒரு கூழாங்கலை எரிக்க எவ்வித வினையும் நிகழ்வதில்லை. மாறாக, கல் சூடாகலாம். இதற்கு காரணம் கொடுக்கப்பட்ட வெப்ப ஆற்றலை கூழாங்கல் ஏற்கவில்லை. எனவே, சொற்கள் வேதிவினைகளை நிகழ்த்த வேண்டுமெனில், வேதிப்பொருட்கள் பேசுகின்ற சொற்களை ஏற்க வேண்டும். அறிந்த வரையில் எந்த வேதிபொருளும் சொற்களை கேட்பதில்லை. எனவே, ஒலியாற்றலை ஏற்று சில வினைபடு பொருட்கள் வினையை நிகழ்த்தினாலும், ஒலி வடிவில் வரும் சொற்களை வினைபடு பொருட்கள் ஏற்காதலால் வேதிவினைக்கு சத்தியமில்லை. இருப்பினும், ஏதேனும் ஒருசில மாற்றங்கள் நிகழுவதற்கு வாய்ப்புகள் உண்டா? என கேட்கலாம்.

இக்கேள்விக்கு அடிப்படை முகாந்திரம் இருக்கிறது. ஆம் முன்னர் பார்த்தார் போல், கூழாங்கல் வெப்ப ஆற்றலை ஏற்காவிடினும், அக்கல்லின் வெப்பத்தில் சிறிது மாற்றம் நிகழுகிறது. சொற்களினால் மாற்றங்கள் நிகழும் என்பதற்கு சில ஆய்வுகளும் மேற்கொள்ளப்பட்டுள்ளது.

குறிப்பாக, ஜப்பானிய ஆராய்ச்சியாளரான மஸாரு இமோடோ (Dr. Masaru Emoto), சொற்களினால் நிகழும் வினைகளை பற்றி ஆய்வுகளை செய்திருக்கிறார். ‘Messages from Water‘ என்ற தலைபின் அடிப்படையில் அவர் செய்த ஆய்வுகளை பல புத்தகங்களாக வெளியிட்டுள்ளார். அவரது ஆய்வின் சாராம்சம் என்னவெனில், சொற்கள், வாழ்த்துகள், வேண்டுதல் உள்ளிட்டவைகளை நீரின் முன் உரைக்க வேண்டும். பின்னர் அந்த நீரினை உறையவைக்க (குளிர்வித்தல்) வேண்டும். அப்பொழுது நீர் குறிப்பிட்ட வடிவத்தில் படிகமாக்கப்படுகிறது. இவரது இந்த ஆய்வின் முடிவு என்னவெனில், நாம் கூறிய சொற்களை பொருத்து படிகமாக்கப்பட்ட நீரின் வடிவும் அமைகிறது என்பது தான்! நீர் படிகமாக்கல் என்பது வேதிவினை அல்ல. இது இயற்பு மாற்றமே. இவரது ஆய்வின் அடிப்படை தத்துவம் என்பது, சொற்கள், எண்ணங்கள், ஒலி உள்ளிட்ட எல்லாமே, ’ஆற்றல்’ என்பது தான். இவரது ஆய்வு முடிவுகளின் மீது பல எதிர்மறை விவாதங்கள் இருப்பினும், அடிப்படை தத்துவமான, ’சொற்கள் ஆற்றலுடையது’ என்பதை ஏற்கத் தானே வேண்டும்.

•••

மருத்துவக் கொள்ளைகள் / கோவை எம் தங்கவேல்

images-17

யாண்டு பலவாக நரையில வாகுதல்

யாங்காகியரென வினவுதிராயின்

மாண்டவென் மனைவியோடு மக்களும் நிரம்பினர்

யான் கண்டனையர் என் இளையரும் வேந்தனும்

அல்லவை செய்யான் காக்கும் அதன்றலை

ஆன்றவிந்தடங்கிய சான்றோர்பலர் யான்வாழுமூரே –

வயதான பிறகும் தலையில் ஒர் நரைமுடி கூட இல்லையே என்று கேட்ட நண்பருக்கு ஆயிரமாயிரம் ஆண்டுகளுக்கு முன்னே வாழ்ந்த பிசிராந்தையார் மேற்படி பாடலை பதிலாக்கினார். பாடலின் ஒரு வரி அர்த்தம் என்ன தெரியுமா? நான் மகிழ்ச்சியுடன் இருக்கிறேன், ஆதலால் எனக்கு நரை திரை இல்லை என்பதுதான். இதென்ன இலக்கியமாக இருக்கிறதே என்று அலறியடித்து ஓட வேண்டாம். விஷயம் இருக்கிறது.

உலகப் புகழ் பெற்ற கோடீஸ்வர வள்ளல் ராக்பெல்லர் உலக மகா கஞ்சனாய், பிசினஸ் பிசினஸ் என்று ஓடி ஓடி சம்பாதித்தவர். பிற்காலத்தில் அவரால் சம்பாதிக்கப்பட்ட அத்தனை பொருளும் பிறருக்கு தானமாய் அளிக்கப்பட்டன. ஏன் தெரியுமா? கோடிகள் குவிப்பது மட்டுமே வாழ்க்கை என்று எண்ணி இருந்தவருக்கு கோடிகளுடன் பரிசாய் நோயும் கிடைத்தது. வாழ்க்கையின் இறுதியில் உலக மகா கஞ்சனாய் வாழ்ந்த ராக்பெல்லர், பிறருக்கு அள்ளிக் கொடுத்து வள்ளல் ராக்பெல்லராய் மாறினார். அந்த மகிழ்ச்சியால் நோயிலே படுத்தவர் ஆரோக்கியமானார். வாழ்க்கையின் வரலாற்றுப் பக்கங்களிலே வள்ளல் என்ற அடைமொழியைப் பெற்றார்.

இந்த உலகில் நோயுள்ளவர்களே இல்லாது இருப்பின் எப்படி இருக்கும் என்று ஒரு கணம் கண்ணை மூடி சிந்தித்துப் பாருங்கள். மனிதராய் பிறந்தால் நோய் இல்லாமல் வாழவே முடியாது என்று நீங்கள் நினைப்பது எனக்குப் புரிகிறது. ஆனால் அது உண்மை அல்ல. மனிதனால் முடியாதது என்று இவ்வுலகில் எதுவும் இல்லவே இல்லை. மனதை மகிழ்ச்சியோடு வைத்துக் கொண்டால் நரை திரை மூப்பு என எதுவும் அண்டவே அண்டாது என்றார்கள் முன்னோர்கள். இதையெல்லாம் நாம் கடைபிடிக்காத காரணத்தால் நாம் எப்படிச் சுரண்டப்படுகிறோம் என்பதையும், கண்டதைத் தின்று விதி வந்த அன்று சாவோம் என்று வாழ்பவர்கள் எப்படி ஏமாற்றப்படுகிறார்கள் என்பதையும் பார்க்கலாம். அதன்பிறகு பிசிராந்தையார் பாடலுக்கு வருவோம்.

இந்தியாவின் கடை மூலையில் சுண்டைக்காய் அளவு கூட இல்லாத இலங்கையில் அடிப்படைக் கல்வி முதல், மருத்துவக் கல்வி வரை இலவசமாய் படிக்க அரசாங்கமே உதவுகிறது. பெற்றோர்களுக்கு ஒரு பைசா செலவும் இல்லை. இலவச சோறு போடாமல், இலவசமாய் படிக்க வைக்கின்றது. அதுமட்டுமல்ல அங்கு மருத்துவ சிகிச்சையும் இலவசம். ஆனால் இந்தியாவில் பாருங்கள். படிக்க வேண்டுமென்று நினைத்தால் ஏழைக்கு அது அவ்வளவு சாத்தியமா? சளி காய்ச்ச்சல் வந்தால் குறைந்தது ஆயிரம் ரூபாய் அல்லவா செலவாகிறது? சுண்டைக்காய் நாடெல்லாம் இலவசமாய் கல்வியையும், மருத்துவத்தையும் அளிக்கும் போது உலகத்திலேயே பெரிய ஜனநாயக நாட்டால் ஏன் கொடுக்க முடியவில்லை? இதைப் பற்றி இறுதியில் பார்க்கலாம். முதலில் தனியார் மருத்துவமனைகள், மருந்துக் கம்பெனிகள் மற்றும் மருத்துவர்கள் மக்களை ஏமாற்றி அடிக்கும் கொள்ளைகள் பற்றி பார்த்து விட்டு நாட்டுப் பிரச்சினைக்கு வருவோம்.

தனியார் மருத்துவமனைகளில் நடக்கும் கட்டண கொள்ளைகளைப் பொறுக்க முடியாமல் ஒருவர், டெல்லி உயர்நீதி மன்றத்தில் வழக்கொன்றினை தாக்கல் செய்தார்.

தனியார் மருத்துவமனைகள் ஏழைகளுக்கு இலவச மருத்துவ சிகிச்சை அளிப்பதாக வாக்குறுதி கொடுத்து, மிக மிகக் குறைந்த விலையில் நிலங்களைப் பெறுவதால், பத்து சதவீதம் உள்நோயாளிகள் மற்றும் இருபத்தைந்து சதவீத புறநோயாளிகளுக்கு இலவசமாய் சிகிச்சை அளிக்க வேண்டும் என்று 2012ம் வருடத்தில் டெல்லி உயர் நீதிமன்றத்தில் நீதிபதிகள் தனியார் மருத்துவமனைகளிடம் அறிவுறுத்தினார்கள். இதோ அவர்களின் கூற்று.

”During the last hearing on July 5, the court had said private hospitals were acting like star hotels and wriggling out from their promise to treat the poor — 25% outdoor and 10% indoor — free of cost. “You got the land at a very cheap rate from the government because of this promise. If you admit a poor patient but ask him to pay for everything, it is not free treatment,” it had said. It had given two weeks to the hospitals to come out with a comprehensive plan to give meaningful free treatment to poor patients under the agreement and if not, then it would vacate stay on Delhi High Court order directing hospitals not to charge a single penny from poor patients.”

தனியார் மருத்துவமனைகள் இலவசமாய் 25 சதவீத புற நோயாளிகளுக்கு சிகிச்சை வழங்கினால் திவால் ஆகி விடுமே என்றும், மருத்துவர்களின் பிழைப்பு பாழாய்ப் போகுமே என்றும் இதைப் படிக்கும் நீங்கள் யோசிப்பீர்கள். நீங்கள் அப்படித்தான் யோசிப்பீர்கள். ஏமாறுவதற்கென்றே பிறப்பெடுத்தவர்கள் அல்லவா நாம்.

2012, ஏப்ரல் 9ம் தேதி அன்று கோலாகல ஸ்ரீனிவாஸ் (நன்றி) என்பவர் தினமணியில் ஒரு கட்டுரை எழுதி இருக்கிறார். அதில் வரும் சாராம்சத்தை பார்த்து விட்டு தனியார் மருத்துவமனைகளின் மீதும், மருத்துவர்கள் மீதும் இரக்கம் கொள்ளுங்கள்.

இந்த உலகில் உழைக்காமல் சம்பாதிப்பதில் நம்பர் ஒன் யார் என்று கேட்டால் அது மருத்துவர்கள் தான் என்றுச் சொல்லலாம். அதற்கு கீழே இரண்டு கணக்கு விபரங்கள் இருக்கிறது. அவசரப்படாமல் படியுங்கள்.

12 மணி நேரம் உடல் வலிக்க கூலி வேலை செய்பவர்களுக்கு சம்பளம் ரூபாய் 150, வீடு துடைக்கும் பெண்ணுக்கு மாதச் சம்பளம் ரூபாய் 3000, டேபிள் துடைக்கும் சப்ளையருக்கு ரூபாய் 5000. இது நமக்கெல்லாம் தெரிந்த கூலிக் கணக்கு. தெரியாத ஒரு கூலிக் கணக்கினை இப்போது பார்ப்போம்.

மூளைக்கான எம் ஆர் ஐ ஸ்கேன் எடுக்க ரூபாய் 6000. இதில் டாக்டருக்கு கமிஷன் ரூபாய் 4000. கம்பெனிக்கு 2000 ரூபாய். ஆறு நோயாளிகளுக்கு மேல் அனுப்பினால் அந்த நோயாளிகளின் மொத்த கட்டணமும் டாக்டருக்கே கொடுக்கப்படும். அதாவது 6000 ரூபாயும் டாக்டருக்கே கிடைக்கும். சிடி ஸ்கேனுக்கு 2500 இதில் 1500 டாக்டருக்கு கமிஷன். ஏன் ஒவ்வொரு டாக்டரும் ஸ்கேன் செய்து விடுங்கள், டெஸ்ட் எடுத்து விடுங்கள் என்று அக்கறையாக கேட்கின்றார்கள் என்று புரிகிறதா? நோகாமல் நுங்கு தின்பவர்கள் யாரென்று கேட்டால் இப்போது நீங்கள் தெளிவாகச் சொல்லி விடுவீர்கள் அல்லவா? இன்னும் மருத்துவர்களின் வசூல் மழை முடியவில்லை. மருந்துக் கடைகளில் கமிஷன், மருந்துக் கம்பெனிகள் இலவசமாய் கொடுக்கும் மருந்துகளை நோயாளிகளிடம் விற்பதில் கிடைக்கும் பணம், பின்னர் சாதாரண நோய்க்கு பல தடவை மருத்துவம் செய்தலில் கிடைக்கும் கன்சல்டேஷன் ஃபீஸ் என்று வசூல் மழைக்கு பஞ்சமே இல்லை.

டாக்டருக்கே இவ்வளவு வருமானம் வரும் என்றால் மருத்துவமனையை நடத்துபவர்களுக்கு எத்தனை கோடி கிடைக்கும் என்று ஒரு நிமிடம் சும்மா ஒரு மனக்கணக்கு போட்டுப் பாருங்கள். கிறுகிறுவென மயக்கம் வரும். நோயாளிகளைச் சுரண்டி, கோடி கோடியாய் குவிக்க முடியும் என்பதால் தானே புற்றீசல் போல தனியார் மருத்துவ மனைகள் முளைத்துக் கொண்டிருக்கின்றன.

ஜெர்மனியைச் சேர்ந்த பேயர் என்ற மருந்து நிறுவனம் கல்லீரல், சிறு நீரகப் புற்று நோய்க்கான 120 எண்ணிக்கை கொண்ட மாத்திரைகளை 2 லட்சத்து 84 ஆயிரம் ரூபாய்க்கு விற்றார்கள். அதாவது ஒரு மாத்திரையின் விலை ரூபாய் 2400 வரும். இதே மருந்தினை இந்தியாவின் ஹைதராபாத்தைச் சேர்ந்த நேட்கோ ஃபார்மா என்ற கம்பெனி இந்திய அரசுடன் மருந்தினை விற்கப் பெரும் போராட்டங்களை நடத்தி, தற்போது 120 மாத்திரைகளை ரூபாய் 8800க்கு அதாவது ஒரு மாத்திரையை 74 ரூபாய்க்கு விற்று வருகிறது. இதுவரை ஜெர்மனி கம்பெனி அடித்த கொள்ளையை ஒரு நிமிடம் நினைத்துப் பாருங்கள். எண்ணிலடங்கா கோடிகளை அல்லவா அவர்கள் குவித்திருப்பார்கள் மன்னிக்கவும் கொள்ளை அடித்திருந்திருக்கின்றார்கள். இத்தனையும் இந்திய அரசு கண்டும் காணாதது போலவே இருந்து வந்தது.

லேட்டக்ஸ் கையுறை வெறும் 50 ரூபாய் பொறுமானமுள்ளது மார்க்கெட்டில் 600 ரூபாய்க்கு விற்கப்படுகின்றதாம். எழுதிக் கொண்டே செல்கிறார் நண்பர். படிக்கப் படிக்க ஆயாசம் தான் எழுந்தது. இதையெல்லாம் கட்டுப்படுத்த வேண்டிய மத்திய அரசு உலகப் பொருளாதார சந்தை என்ற கொள்கையால் தனியார்கள் மக்களைச் சுரண்டிக் கொள்ளை அடிக்க உதவி செய்து வருகின்றது. யாரால் என்ன செய்ய முடியும் சொல்லுங்கள் பார்ப்போம்?

அதிக விலை என்பதை ஒரு வகையில் ஏற்றுக் கொண்டாலும் அதை விடக் கொடுமையாக அடிக்கும் கொள்ளை அல்ல அல்ல கொலைகளையும் மருத்துவ உலகம் நடத்திக் கொண்டு வருகிறது. அது என்ன தெரியுமா? இந்திய அரசால் தடை செய்யப்பட்ட மருந்துகளை எந்த வித தடையுமின்றி மருந்துக் கம்பெனிகள் தயாரித்து விற்று வருகின்றன. இதற்கு ஒரு நண்பரின்(உயிரோசை- திரு எர்னஸ்டோ குவேரா – நன்றி) கட்டுரையினை ஆதாரமாய் எடுத்துக் கொள்வோம். இந்திய அரசின் கெஜட்டில் மத்திய அரசின் மருந்துக் கட்டுப்பாடு வாரியத்தால் 79 வகையான மருந்துப் பொருட்கள் தடைசெய்யப்பட்டவை என அறிக்கைகள் வெளியிடப்பட்டிருக்கின்றன. அவை மனித உயிருக்கு உலை வைக்கும் கொடூரத்தன்மை கொண்ட பக்க விளைவுகளை உருவாக்கும் என்பதால் தடை செய்யப்பட்டது. ஆனால் இதையெல்லாம் யார் கண்டு கொள்ளப்போகின்றார்கள் என்று மருந்துப் பொருட்கள் தயார் செய்யும் கம்பெனிகள் இதுகாறும் தடைசெய்யப்பட்ட மருந்துகளை தொடர்ந்து தயாரித்து, விற்பனை செய்து கொண்டுதான் இருக்கின்றன. இவ்வகை மருந்துகளைச் சாப்பிடுவோர் பலவித புது விதமான நோய்களில் விழுந்து செத்துக் கொண்டிருக்கிறார்கள். இந்திய சுகாதாரத்துறை வேடிக்கை பார்த்துக் கொண்டு வாளாமல் இருக்கின்றது. அப்படி இந்திய அரசால் தடை செய்யப்பட்ட சில மருந்துகளை பார்க்கலாம்.

1.அனால்ஜின்(Analgin) – பயன்பாடு – வலி நிவாரணி பக்க விளைவு – எலும்பு மஜ்ஜை சீர்கேடு

2.நிமிசுலைட்(Nimisulide) பயன்பாடு – வலி நிவாரணி மற்றும் காய்ச்சல் பக்க விளைவு – கல்லீரல் செயல் இழப்பு

3.பினைல் ப்ரோபநோலமைன்(phenyl propanolamine)பயன்பாடு – சளி மற்றும் மூக்கு ஒழுகுதல் பக்க விளைவு – மூளைக்குச் செல்லும் ரத்த நாளங்களில் ஏற்படும் திடீர் அடைப்பால் சுயநினைவு இழத்தல்

4.சிசாபிரைடு(cisapride) பயன்பாடு – மலச்சிக்கல் மற்றும் அதிக அமிலம் சுரத்தலை கட்டுப்படுத்துதல், பக்க விளைவு – இதயத் துடிப்பு சீர்கேடு

5.குயிநோடக்ளர்(quinodochlor) பயன்பாடு – வயிற்றுப்போக்கு கட்டுப்படுத்துதல் பக்க விளைவு – கண்பார்வை பாதிப்பு

6.பியுரசொளிடன்(Furazolidone)பயன்பாடு – வயிற்றுப்போக்கு கட்டுப்படுத்துதல் பக்க விளைவு – புற்றுநோய்

7.நைட்ரோபியுரசொன்(Nitrofurozone) பயன்பாடு – கிருமிகளை அழித்தல், பக்க விளைவு – புற்றுநோய்

8.ஆக்சிபென் பியுட்டசொன்(Oxyphenbutozone)பயன்பாடு – வலி நிவாரணி பக்க விளைவு – எலும்பு மஜ்ஜை சீர்கேடு

9 . பைப்பரசின் (Piperazine) பயன்பாடு – வயிற்றுப் புழுக்களை அழித்தல் பக்க விளைவு – நரம்புச் சிதைவு

10 . பினப்தலின் (Phenophthalein ) பயன்பாடு – மலமிலக்கி பக்க விளைவு – புற்றுநோய்

இந்த மருந்துகளின் விற்பனைப் பெயர்கள் கீழே

1. அனால்ஜின் – Paralgan-M,Novalgin,

2. நிமிசுலைட் -Monogesic,N lid,Nam,Nelsid,Nimbus,Nimulid,Nise,Nugesic,Sumo,Zydol

3. பினைல் ப்ரோபநோலமைன் – D-cold,Coldact,

4. சிசாபிரைடு -Alipride,Cisapro,Santiza,Unipride

5. பியுரசொளிடன் – Furoxone

6. பைப்பரசின் -Piperazine citrate

7. குயிநோடக்ளர் – Entero quinol

நிமிசுலைட் பாரசெட்டமல் மருந்தைத் தொடர்ந்து சாப்பிட்டால் இதய நோய் வரும் என்று பின்னால் தான் தெரிய வந்ததால், 2004இல் மத்திய அரசு தடை செய்தது. இம்மருந்தினை அதிக அளவில் தயார் செய்து வைத்திருந்த மருந்துக் கம்பெனிகள் விழி பிதுங்கி நின்ற போது, 200 கோடியை வாங்கிக் கொண்ட முன்னாள் மத்திய அமைச்சர் மருந்தை ஆறு மாதம் விற்பனை செய்ய தடையை நீக்கி உதவினார் என்று நண்பர் எழுதியிருக்கிறார்.

அதுமட்டுமா முன்னாள் உச்சபதவியில் இருந்தோரின் நட்பு உறவுகளில் பலர் போலி மருந்து தயார் செய்து தமிழக மக்களைக் கொன்று வந்தார்கள் என்பதையெல்லாம் கடந்த கால செய்திகளில் நாம் படித்திருக்கிறோம். அதாவது காசைக் கொடுத்து நம்மை நாமே கொலை செய்து கொண்டிருக்கிறோம்.

ஜன நாயக நாட்டில் ஐந்தாண்டுகளுக்கு ஒரு முறை தான் நம்மால் ஏதாவது செய்ய முடியும். இந்திய அரசியலமைப்புச் சட்டம் அப்படித்தான் இருக்கிறது. குற்றவாளிகளுக்கு ஏதுவாய்த்தான் சட்டங்கள் இருக்கின்றன. ஏனென்றால் ஒரு நிரபராதி கூட தண்டிக்கப்படக்கூடாதாம். உண்மையில் நிரபராதிகள் தான் தண்டிக்கப்பட்டுக் கொண்டே வருகின்றார்கள். மக்கள் பணி செய்ய வரும் அரசியல்வாதிக்கு தனியார் மருத்துவமனையிலே ஸ்பெஷல் சிகிச்சை கிடைக்கும். ஆனால் அந்த அரசியல்வாதியைத் தேர்ந்தெடுத்த மக்களுக்கோ குப்பைத் தொட்டிபோல காட்சியளிக்கும் மருத்துவமனைகளிலே சிகிச்சை கிடைக்கும். இதைத்தான் ஜன நாயகம் என்பார்கள். இதைப் பற்றி பிறிதொரு நாள் பார்த்துக் கொள்ளலாம்.

இத்தனை அயோக்கியத்தனங்களைச் செய்து கொண்டிருக்கும் மருத்துவ உலகை கட்டுபடுத்தாமல் அரசாங்கம் வேடிக்கை பார்த்துக் கொண்டிருக்கிறது. ஏன் தெரியுமா? அரசு மக்களை கருணையினாலோ அல்லது ஓட்டுப் பெறுவதற்காகவோ வாழ அனுமதித்து இருக்கிறது. அரசுக்கு மக்கள் தேவையில்லை என்றால் அடுத்த நிமிடம் அழித்து முடித்து விடும்.

இந்தியா சுதந்திரம் அடைந்து 60 ஆண்டுகள் ஆன பிறகும் இன்றைக்கும் இந்தியாவில் பசியோடிருப்பவர்கள் இருக்கத்தானே செய்கின்றார்கள்? இந்த நிலைக்கு மக்களை உட்படுத்தி இருக்கும் அரசியல்கட்சிகள் மருத்துவத்துறையில் தனியாரை அனுமதித்த காரணம் சேவை என்றா நினைக்கின்றீர்கள்? அரசியல்வாதிகளின் கறுப்புப் பண வேட்டையில் கோடிகள் குவிய வேண்டும் என்ற பேராசைதான் காரணம். எந்த ஒரு அரசியல்வாதிக்கும் மக்களின் மீது அபிமானமோ, அன்போ, நன்றியுணர்ச்சியோ இருந்ததே இல்லை. இந்தியாவில் மருத்துவத்துறையானது தனியார் கைக்குப் போனது போனதுதான். இனி அது அரசின் பிடிக்குள் வரவே வராது. வரவும் விட மாட்டார்கள். கல்விக்கு கோடிக்கணக்கில் பணம் கொடுத்து படித்து, மருத்துவராய் வருகின்றவர்கள் கொள்ளையடிக்கத்தான் செய்வார்கள், கோடிகளை லஞ்சமாய் கொடுத்து மருத்துவமனை தொடங்குபவர்கள் கொள்ளை அடிக்கத்தான் செய்வார்கள். இதையெல்லாம் தடுக்க வேண்டிய அரசு, இந்தியாவை உலகப் பொருளாதாரச் சந்தையாக மாற்றி விட்டிருக்கிறது. இனி மருத்துவத்துறையில் அரசு என்ன செய்தாலும் தனியாரைக் கட்டுப்படுத்தவே முடியாது. ஆனால் ஒவ்வொரு தேர்தலின் போதும் அரசியல்வாதிகள் சொல்லும் பொய் உறுதிகளை நம்பி நம்பி கெட்டுப் போய்க் கொண்டே தான் இருப்போம்.

ஆகவே பிசிராந்தையாரைப் பின்பற்றுவதை விட மக்களுக்கு வேறு வழியே இல்லை. நோயற்ற வாழ்வு வாழ முயற்சிக்க வேண்டும். நோயாளிகளே இல்லையென்றால் தனியார் மருத்துவமனைகளின் ஆட்டம் கொஞ்சம் கொஞ்சமாய் அழிந்து போய் விடும் அல்லவா? அதற்கு என்ன உண்வு சாப்பிட்டால் உடலுக்கு நல்லது, எது கெட்டது என்ற அறிவும் எப்போதும் மகிழ்ச்சியுடன் இருக்க வேண்டுமென்ற திடமும் கொண்ட வாழ்க்கை முறையினை அமைத்துக் கொண்டால் நரை, திரை, மூப்பு இன்றி வாழ்வாங்கு வாழலாம். அரசு செய்யத் தவறியதை தனி மனித ஒழுக்கத்தினாலும், கட்டுப்பாடான வாழ்க்கை முறையாலும் மக்கள் செய்யலாம்.

•••

சினமும் அணுவும் – முனைவர். ஆர். சுரேஷ், ஆராய்ச்சியாளர்,

download

’சினம்’ என்ற கோபமானது ஒரு வகை உணர்ச்சி. பொதுவாக, நம்மை அச்சுறுத்தும் சக்தியினை (ஆற்றல்) எதிர்க்க, இவ்வுணர்ச்சி தோன்றுகிறது. அச்சுறுத்தும் சக்தியானது பிறரிடமிருந்து வரும் சொல்லாகவோ, செயலாகவோ இருக்கலாம். ஆக, எதிர் வரும் சக்தியினை எதிர்க்க உடலில் தோன்றும் சக்தி தான் கோபம்! சக்தி நல்லது தானே? இருப்பினும் ஏன் கோபப்பட கூடாது என்கிறார்கள் நம் முன்னோர்கள். தெய்வப்புலவர் திருவள்ளுவர், கோபப்படுவதால் ஏற்படும் தீமையை இவ்வாறாக அறிவுருத்துகிறார்.

நகையும் உவகையும் கொல்லும் சினத்தின்
பகையும் உளவே பிற (குறள் 304)

அதாவது, முகமலர்ச்சியும் அகமலர்ச்சியும் கொல்லுகின்ற சினத்தை விட ஒருவனுக்கு பகையானவை வேறு உள்ளனவோ? (டாக்டர் மூ.வ. வின் உரை) என்று எச்சரிக்கிறார் திருவள்ளுவர்.

அதீத சக்தி, அதனை பெற்றவைகளை பாதிக்கும். உதாரணமாக, ஒருவர் தன்வீட்டு சுவரில் ஆணி ஒன்றை அடிக்க விரும்புகிறார். கூராண ஆணியை சுவரில் வைத்து கையாலே திருகுகிறார். ஆணி சுவரில் ஏறுமா? நிச்சயம் ஏறாது என்பது அனைவருக்கும் தெரியும். ஆணி சுவரில் துலையிட்டு செல்ல, அவர் என்ன செய்ய வேண்டும். சுத்தி கொண்டு ஆணியை அடிக்க வேண்டும். இந்நிகழ்வே சுவற்றை அச்சுறுத்தும் சக்தியாகும். கொடுக்கப்படும் இச்சக்தியினை சுவரு சும்மா வாங்கி கொள்ளுமா? இல்லை. அதற்கு கோபமாகிய எதிர்பினை சுவரு காட்டும். இதன் விளைவு, ஆணி சுலபமாக சுவரில் ஏறாது! அதனையும் மீறி ஆற்றலை கொடுக்கும் போதுதான் ஆணி சுவற்றில் ஏறும். அதிகப்படியான ஆற்றல், கோபப்பட்ட சுவற்றை உடைக்கவும் செய்யலாம்! இதேபோன்று தான், கோபப்பட்ட மனிதனையும் அது அழித்துவிடுகிறது.

கோபமானது உணர்ச்சி என்பதால், அதனை முழுவதுமாக நீக்கி விட முடியாது. இருப்பினினும் அதன்பால் வரும் துன்பங்களை உணர்வதின்மூலம் அதனை கட்டுபடுத்த முடியும். ஆம், கோபத்தை தூண்டுவிக்க கூடிய சக்தி நம்மை தாக்கினாலும் கோபம் கொள்ளாது இருப்பது நல்லது என்பதை நாலடியார் பாடல் ஒன்று இவ்வாறாக விளக்குகிறது.

….ஈயுந் தலைமேல் இருத்தலால் அஃதறிவார்
காயும் கதமின்மை நன்று. (நாலடியார் 61)

இதன் விளக்கமாவது, அற்ப ஈயும் மிதித்து ஏறித் தலைமேல் உட்காருதலால், அந்நிலையை உணர்ந்த சான்றோர், தம்மை அவமதிப்போர் மீது கோபம் கொள்ளாதிருத்தல் நன்று என்பதாகும்.

தமிழ் பாட்டி ஒளவையும் ’ஆறுவது சினம்’ என்கிறார். அதாவது, கோபமானது ஆறக்கடவது.

மேலும் கோபப்படும் பொழுது ஏற்படும் உடல்ரீதியான இரசாயண மாற்றங்களையும் அதினால் ஏற்படும் துன்பங்களையும் நவீன அறிவியல் உலகமும் கண்டறிந்துள்ளது. இதனால் கோபத்தை கட்டுபடுத்த அல்லது தவிர்கும் வழிமுறைகளும் இதன் துறைசார்ந்த அறிஞர்களால் வகுக்கப்பட்டுள்ளன.

இருப்பினும் கோபத்தை காட்ட வேண்டிய நேரத்தில் அல்லது இடத்தில் கோபப்பட்டாக வேண்டும் என்பதனை,

’பாதகஞ் செய்பவரைக் கண்டால் – நாம்
பயங்கொள்ளலாகாது பாப்பா.
மோதி மிதித்துவிடு பாப்பா – அவர்
முகத்தில் உமிழ்ந்துவிடு பாப்பா’ என குழந்தையின் மனதில் விதைக்கிறார் பாரதியார்.

இது என்ன? கோபம் வேண்டுமா? வேண்டாமா? என்ற வினா எழுகிறது. குழம்ப தேவையில்லை. அளவான கோபம், இன்பம் பயக்கும் என்பதை

’ஊடுதல் காமத்திற்கு இன்பம் அதற்கின்பம்
கூடி முயங்கப் பெறின் ’(குறள் 1330)

என்று குறிப்பிடுகிறாரே! திருவள்ளுவர். முழுமையான விளக்கத்தை பாராவிடினும், சுருக்கமாக, நன்மை பயக்கும் என்றால் அளவான கோபம் நல்லது தானே!

சரி, உயிரினங்கள் மட்டும் தான் கோபப்படுமா? உயிரற்ற ஜடப்பொருட்கள் கோபப்படாதா? என்றால், அவைகளும் கோபங்கொள்ளும் என்றே கூறலாம்! ஆம், ஆற்றலை கொடுக்கும் பொழுது, உயிரற்றவைகளின் அடிப்படையான ’அணுக்களும்’ கோபங்கொள்கின்றன! ஜடபொருளுக்கு உணர்ச்சிகள் இல்லையென்பதால், அவைகள் கொள்ளும் கோபத்தை ’கோபம்; என்று சொல்லாமல் ’கிளர்வு நிலை’ என்கிறோம்.

ஒளி அல்லது மின்னாற்றலை அணுக்களுக்கு கொடுக்கும் பொழுது, தன்னை எதிர்த்து வரும் இச்சக்தியினை வாங்கிக் கொள்ளும் அணுக்கள் கிளர்வு நிலைக்கு செல்கின்றன. அதாவது, இவ்வணுக்களின் ஆற்றல் அதிகரிக்கின்றது. இந்நிலையில், அணுக்கள் சும்மாய் இருப்பதில்லை! மனிதர்களை போன்றே ஒரு வித பதற்றுத்துடனே இருக்கின்றன. எப்பொழுதுமே, கிளர்வு நிலையை விரும்பாத அணுக்கள் பல வகையில் தான் பெற்ற ஆற்றலை (கோபத்தை) வெளிக்கொணர்ந்து தனது இயல்பு நிலைக்கு திரும்புகின்றன. ஆருவது சினம்! ஒளவையின் வாக்காயிற்றே! ஆற்றல் வெளிப்பாடானது அணுக்களை பொருத்தும் அவைகள் எதிர் நோக்கிய சக்தியை பொருத்தும் அமைகிறது.

கிளர்வு கொண்ட சில வகை அணுக்களின் தொகுதி (மூலக்கூறு), சில மனிதர்களை போன்றே, அதிர்வுருகின்றன. இதனை ’மூலக்கூறு அதிர்வு’ என்கிறோம். இவ்வதிர்வின் காரணமாக தனது அதிகப்படியான ஆற்றலை (வெப்ப ஆற்றலாக), அருகில் உள்ள சக மூலக்கூறுகளுக்கு கொடுத்து (கோபத்தை காட்டி), தான் இயல்பு நிலைக்கு திரும்பிவிடுகின்றன! உதாரணமாக, அதிகாலையில் செய்யப்படும் சூரிய வணக்கத்தை கருதலாம். காலை பொழுதில் வெளிப்படும் சூரியக்கதிரில் அகச்சிவப்பு கதிர்கள் அதிகம். இக்கதிர்கள் நம் உடலில் படும்பொழுது, உடலின் மூலக்கூறுகள் எதிர் சக்தியான அகச்சிவப்பு கதிர்களை உறிஞ்சி அதிர்வுருகின்றன. இதனால், உருவாகும் வெப்பம் இரத்த நாலங்களை விரித்து, இரத்த ஓட்டத்தை அதிகரிக்கிறது. இதனால் உடல் புத்துணர்ச்சியினை பெருகிறது.

download-15
வேறு சில வகை கிளர்வு கொண்ட அணுக்களோ! தான் பெற்ற ஆற்றலை ஒளியாக உமிழ்கின்றன! ஆம், தான் பெற்ற எதிர்ப்பு சக்தியினால் உயர் ஆற்றல் மட்டத்திற்கு செல்லும் அணுக்கள் உடனே, அதிக படியான ஆற்றலை புற ஊதா கதிராகவோ அல்லது கண்னுரு ஒளியாகவோ உமிழ்ந்து, தனது இயல்பு நிலையை அடைகின்றன. உதாரணமாக, வீட்டில் பயன்பத்தப்படும் ஒளிரும் விளக்குகளை (CFL) கருதலாம். மின்னாற்றலை செலுத்தும் பொழுது, இவ்விளக்குகளில் உள்ள பாதரச அணுக்கள் கிளர்வு நிலைக்கு செல்கின்றன. உடனே, அவைகளின் ஆற்றலை புறஊதா கதிராக வெளியிட்டு தான் இயல்பு நிலைக்கு வந்தடைகின்றன. இப்புறஊதா கதிரினை கண்னுரு ஒளியாக மாற்ற வேறு சில வேதிபொருட்களும் விளக்கின் உட்புறத்தில் பயன்படுத்தப்படுகிறது.

கொடுக்கப்படும் அதிக அளவு ஆற்றலை உறிஞ்சும் சிலவகை அணுக்கள் மேற்கண்ட வழிகளை பின்பற்றி ஆருவதில்லை! அதாவது, கிளர்வு நிலையிலிருந்து திரும்பாமல், தன்னுள் உள்ள அடிப்படை துகளான எலக்ட்ரானை இழந்து தனது பண்பினை முழுவதுமாக மாற்றிக் கொள்கின்றன. இன்னும் சிலவகை அணுக்களோ, தன்னுடைய அகமான உட்கருவினுல் மாற்றத்தை நிகழ்த்தி சிதைவுருகின்றன. அத்தோடு, அவை வெளியிடும் ஆற்றல் உயிரினங்களுக்கும் பேராபத்தை விளைவிக்கும். உதாரணமாக கட்டற்ற அணுக்கரு சிதைவு வினையை அடிப்படையாக கொண்டு இயங்கும் அணுகுண்டினை கருதலாம். இதனை தான்,

சினமென்னும் சேர்ந்தாரைக் கொல்லி இனமின்னும்
ஏமப் புணையைச் சுடும் (குறள் 306) என்றாரோ? திருவள்ளுவர்.

ஆக மொத்தத்தில், அளவான சினம் கொண்ட அணுக்கள், அதாவது, தணியகூடிய சினத்தை கொண்ட அணுக்கள் ஒருசில துன்பத்தோடு (அதிர்வு, வெப்பம்) தன்நிலைக்கு திரும்புகின்றன. இவைகளால் இன்பமும் விளையலாம். தனிக்கமுடியா சினம் கொண்ட அணுக்களோ, தன்னையும் கொன்று பிறவற்றையும் அழித்துவிடுகிறது.

நம் வாழ்வியலுக்கு தேவையான இலக்கிய கோட்பாடுகள் அறிவியல் கண்டுபிடிப்புகளின் அடிப்படையான அணுக்களுக்கும் பொருந்துகிறது. அதேபோல் அணுவின் அறிவியல், நம் வாழ்விற்கும் பொருந்துகிறதல்லவா? ஆஹா… அறிவியலும் அறம் புகட்டுமோ? வியப்பில்லை! இலக்கியங்கள் வாழ்வை நெறிபடுத்தி நன்மை பயக்கும். வாழ்வில் நன்மை கிட்டவே, அறிவியில் ஆய்வுகளும் தொடர்ந்து மேற்கொள்ளப்படுகின்றன. இலக்கியம் மற்றும் அறிவியிலின் நோக்கம் ஒன்றெனில் அறத்தின் சாயல் அறிவியலில் தெரிவதில் வியப்பில்லை! இதற்கு சான்றாக, எதிர்கால சந்ததியின் நன்மைக்காக, தங்களது வாழ்வை அறிவியலுக்காகவே அற்பனித்த பல தவப்புதல்வர்களை இவ்வுலகம் கண்டிருக்கிறது.

***

சினமும் அணுவும்

முனைவர். ஆர். சுரேஷ்,
ஆராய்ச்சியாளர்,
பகுப்பாய்வு மற்றும் கனிம வேதியியல் துறை,
கன்செப்ஷன் பல்கலைக்கழகம், சிலி
மின்னஞ்சல்: sureshinorg@gmail.com; அலைபேசி: +56-9-98316720

கைபேசி கூட இல்லாத ஒரு நிறுவனத் தலைவர் – ஸ்டீவ் ஹில்டன் / தமிழில் ஸ்ரீ னி

images (1)

ஆங்கில மூலம் – https://www.theguardian.com/technology/2016/jan/11/steve-hilton-silicon-valley-no-cellphone-technology-apps-uber

நான் ஸ்டீவ் ஹில்டன். மேலே படிக்கும் முன் ஒன்றை நம்புங்கள். நான் உங்களை மாற்ற முயலவில்லை. உங்களுக்கு போதனை தரவோ, குறைகூறவோ போவதில்லை. சில நேரங்களில் அப்படித் தோன்றினால் மன்னிக்கவும். எனது நோக்கம் அதுவல்ல. எனது செயல்கள் பற்றியே பேசப் போகிறேன்.

சில காலம் முன் நான் இங்கிலாந்துப் பிரதமருக்கு அரசின் கொள்கைகளுக்கான ஆலோசகராக இருந்தேன். இப்போது ஒரு கணினி துளிர் நிறுவனத்தை நடத்தி வருகிறேன். இதுவே பலருக்கு வியப்பு. பள்ளி, கல்லூரி நாட்களில் புத்தகம் படிப்பதையே வெறுத்த நான், இப்போது ஒரு புத்தகத்தை எழுதியுள்ளேன் என்பது கூடுதல் வியப்புதானே.

இவற்றை விட பலரும், ஏன், எல்லோருமே நம்ப முடியாமல் வியக்கும் செய்தி ஒன்று உண்டு. ஆம். என்னிடம் கைபேசி இல்லை. ஸ்மார்ட் போனைச் சொல்லவில்லை. சாதாரண எண்களைக் கொண்ட பழங்காலக் கைபேசி கூட இல்லை. எந்த விதமான கைபேசியையும் நான் பயன்படுத்துவதில்லை. என்ன? பிறகு எப்படி என்னிடம் பேசுவதா? என்னிடம்தான் தொலைபேசி (landline) இருக்கிறதே. எந்தக் கைபேசியில் இருந்தும் அதற்கு அழைக்கலாமே. வீட்டிலும் அலுவலகத்திலும் தொலைபேசி உள்ளது. இது போதுமே.

இதைப்பற்றிக் கேள்விப்படும் பலரும் என்னை ஒரு மாதிரியாகப் பார்ப்பது எனக்குப் பழகி விட்டது. ‘நீர் எப்படி ஐயா வாழ்கிறீர்?’ என்பதே பலரது கேள்வி. ‘அது சரி. உங்கள் மனைவி எப்படி உங்களோடு வாழ்கிறார்?’ இது பலரது வியப்பு. அவரைப் பற்றி பிறகு சொல்கிறேன்.

இந்த நவீன உலகில், தொழில் நுட்பங்களின் கோட்டையான சிலிக்கான் வேலியில் எப்படி ஒரு மனிதன் கைபேசி இல்லாமல் வாழ முடியும்?

நான் மூன்று ஆண்டுகளுக்கு மேலாக கைபேசி இல்லாமல் வாழ்ந்து வருகிறேன். எனது அனுபவங்களைப் பற்றி பலரும் கேட்கின்றனர்.

இதோ எனது கதை.

2012. இங்கிலாந்து. என் மனைவி ரேச்சல் கூகுள் நிறுவனத்தில் முக்கியப் பதவியில் இருந்தார். கடும் வேலை அவரைக் கசக்கிப் பிழிந்தது. நான் இங்கிலாந்துப் பிரதமருக்கு அரசின் கொள்கை ஆலோசகராக இரண்டு ஆண்டுகள் வேலை செய்து வந்தேன். அரசு எந்திரத்துடன் என்னால் ஒத்துப் போக முடியவில்லை. வேலை கசந்துபோன நானும் மனைவியும் இரு மகன்களுடன் வேறு நாடு போக முடிவு செய்தோம். கலிபோர்னியாவின் சான்பிரான்சிஸ்கோ கடற்கரைப் பகுதிக்கு நாடு மாறிப் போனோம்.

அப்போது இங்கிலாந்து அரசு தந்த கைபேசி வைத்திருந்தேன். அது ஒரு சாதாரண நோக்கியா கைபேசி. நான் எப்போதும் எந்த ஸ்மார்ட் போனையும் பயன்படுத்தியதில்லை. எல்லா நேரமும் அலுவலக மின்னஞ்சல்கள் என்னைப் பின் தொடர்வது எனக்குப் பிடிக்காது.

அந்த போனும் கலிபோர்னியா வந்தபின் வேலை செய்யவில்லை. எனவே அதே போன்ற பழங்காலக் கைபேசியைத் தேடி அலைந்தேன். எந்தக் கடையிலும் சாதாரணக் கைபேசி விற்கப் படுவதே இல்லை என்பதை அறிந்து வியந்தேன். ஒரு வழியாக eBay வழியே கிடைத்தது. சிறிது காலம் பயன்படுத்தினாலும் அடிக்கடி சிக்கல் வந்தது. சரி செய்ய ஆட்கள் கிடைக்கவில்லை. ஒரு நாள் மாலை, கடற்கரையில் அதன் சார்ஜ் போடும் துளையில் மணல் அடைத்துக் கொண்டது. ‘அவ்வளவுதான். இனி இது வேலை செய்யாது. போதும் கைபேசியின் தேடல். கைபேசி இல்லாவிட்டால் என்ன ஆகிவிடும்? வாழ்க்கை முடிந்து விடுமா என்ன? ‘ என்று யோசித்தபடியே அந்தக் கடைசி கைபேசியையும் குப்பைத்தொட்டியில் அடக்கம் செய்தேன்.

அது என் வாழ்க்கையின் மிக முடிவு என்பதை அப்போது அறியவில்லை. ஒரு வார காலம் நன்றாகவே போனது. நடைபயணம், சைக்கிள், பேருந்து என பயணங்கள் எந்த இடையூறும் இன்றி இனிமையாகவே இருந்தன. மிகமிக மகிழ்ச்சியாக உணர்ந்தேன். மிக ஓய்வாகவும் செயல்களில் முழு கவனத்தோடும் இருப்பதை உணர்ந்தேன். கலிபோர்னியாவுக்கு மாறியதே பெரிய மாற்றம் என நினைத்திருந்தேன். ஆனால் இதுவே என் வாழ்வை மாற்றிய முக்கிய செயல் ஆனது.

‘ஒருவேளை விரைவில் கைபேசி வாங்க நேரிடலாம். ஆனால் முடிந்தவரை தள்ளிப் போடுவோமே.’ என்று உறுதியோடு இருந்தேன். அப்போது செப்டம்பர் 2012. இன்று வரை அதே உறுதியோடு வாழ முடிகிறது.

என்னிடம் பலரும் கேட்கும் கேள்வி இது. ‘மக்கள் எப்படி உங்களைத் தொடர்பு கொள்கிறார்கள்?’

‘மின்னஞ்சல்.’ நான் ஒன்றும் காட்டுக்கு ஓடிப் போய்விடவில்லையே. என்னிடம் மடிக்கணினி உள்ளது. இணைய இணைப்பும் தான். தினமும் அதில்தான் வேலை செய்கிறேன். பயணங்களிலும் கொண்டு செல்கிறேன். விமான நிலையங்களிலும் மின்னஞ்சல் பார்த்து வருகிறேன்.

எந்தச் சிக்கலும் இன்றி வியாபாரச் சந்திப்புகளையும் நடத்தி வருகிறேன். காலையில் நியூயார்க். மாலையில் வாஷிங்டன் டிசி என்று கூட வாடிக்கையாளர் சந்திப்புகள் நடத்துகிறேன். கடைசி நிமிட மாறுதல்கள், காலதாமத அறிவிப்புகள் கூட மின்னஞ்சல் வழியே அனுப்புகிறேன். பெறுகிறேன்.

‘உங்கள் பிள்ளைகளுக்கு ஏதேனும் ஆகிறது என்றால் என்ன செய்வீர்கள்?’ இதுவே பலரும் அக்கறையுடன் கேட்கும் கேள்வி. 8, 4 வயது மகன்கள். பொறுப்பான பிள்ளைகள். எனது நேரத்தை அவர்களுடன் முழுமையாகக் கழிக்கிறேன். அவர்களை மிகவும் நேசிக்கிறேன். அதற்காக அவர்களுடன் எப்போதும் தொடர்பில் இருக்க வேண்டுமா என்ன? அவர்களுக்கு ஏதாவது ஆகிறது எனில் யாராவது மனிதர்கள் அருகில் இருப்பர். நம் பெற்றோர்கள் எப்படி நம்மை வளர்த்தார்கள்? நாம் கைபேசியுடன் வளரவில்லையே. அட. இருபது ஆண்டுகள் முன்பு வரை மனித வரலாற்றிலேயே கைபேசி இல்லையே.

அடுத்து எனது துளிர் நிறுவனம். ‘எப்படி கைபேசி இல்லாமல் ஒரு நிறுவனத்தை நடத்த முடியும்?’ ‘அட. அங்கும் தொலைபேசி உள்ளதே.’ எமது நிறுவன வலைத்தளங்களும் செயலிகளும் கைபேசியில் எப்படி செயல்படுகின்றன என்பதை பிறரது கைபேசியில் காட்டச் சொல்லி அறிகிறேன்.

இந்த மூன்று ஆண்டுகளில் ஒரே ஒரு சந்திப்புதான் சிக்கல் ஆனது. எனது காலதாமதம் பற்றி கடைசி நேரத்தில் அறிவிக்க இயலவில்லை. அது கஷ்டமாகத்தான் இருந்தது. அதைத் தவிர வேறு எந்தச் சிக்கலும் இதுவரை இல்லை.

என்னால் முடியாத சில விஷயங்களும் உள்ளன. பலருக்கும் தெரியும் பல செய்திகள் எனக்குத் தெரிவதே இல்லை. சமூக ஊடகத் தகவல்கள், கிசுகிசுக்கள், தட்ப வெப்பநிலை, பிரபலங்களின் வாழ்க்கை போன்றவற்றை நான் அறிவதே இல்லை. எப்போதும் கைபேசியைத் தடவிக் கொண்டே இருப்போருக்கு இவை எல்லாமே தெரிகிறது. ஆனால் அதற்காக அவர்கள் நாள் முழுதும் கைபேசியுடன் மட்டுமே செலவிடுகின்றனர்.

இன்னொரு சிக்கல். என்னால் உபர் டாக்ஸியைப் பெற முடிவதில்லை. உபர் டாக்ஸி சேவையைப் பெற அவர்கள் செயலி வழியாக மட்டுமே பதிவு செய்ய முடியும். இந்த ஊரில் பலருக்கும் அது தண்ணீர் போல அவசியமான ஒன்றாக உள்ளது. எனக்கு இல்லை. நான் எனது சைக்கிள், பேருந்து, ரயில் இவற்றை மட்டுமே பயன்படுத்துகிறேன். ஒருமுறை ஒரு இரவு விருந்து முடிந்து வெகு நேரமாகிப் போனதால் நண்பர் மூலமாக டாக்ஸி பதிவு செய்து அவரிடம் பணம் தந்து விட்டேன்.

நீங்கள் என் மனைவியிடம் பேசினால் இவ்வாறு கூறுவார் என நினைக்கிறேன். ‘ஸ்டீவ் ஒரு சுயநலவாதி. அவர் கைபேசி பயன்படுத்துவதில்லை. ஆனால் அவசரத் தேவைகளுக்கு பிறர் கைபேசிகளின் உதவியை எதிர்பார்ப்பார். முழு உலகமே அவரையே சுற்றுகிறது என்று நம்புகிறார். எல்லாமே திட்டமிட்டபடியே நடக்க வேண்டும் அவருக்கு. மாலை 4 மணிக்கு சந்திக்க வேண்டும் என முடிவு செய்தால், அவ்வாறே செய்தாக வேண்டும். கடைசி நேர மாறுதல்களைக் கூட அவரிடம் சொல்ல இயலாது. எப்படிச் சொல்வது? அவரிடம்தான் கைபேசி இல்லையே. இதனால் எனக்குப் பலநேரம் கோபம் வரும்.’

உண்மைதான். இது போன்ற சண்டைகள் அடிக்கடி எங்களுக்குள் நடக்கும். அவசரத் தேவைகளுக்கு பிறர் கைபேசிகளைப் பயன்படுத்துவது, அதுவும் ஓசியிலேயே, நல்லதில்லைதான். ஆனால் இது எப்போதுமே அல்ல. மாதத்தில் 4-5 முறைதான். எனது முடிவுகள் இது போன்ற சூழ்நிலைகளைத் தரும் என்பது நான் யூகித்ததுதான்.

மிக முக்கியமான கேள்வி இதோ. ‘உங்கள் சொந்த முடிவுகளுக்காக பிறரைக் கஷ்டப் படுத்துவது சரியா?’

‘திட்டமிட்டபடி நடப்பது சரிதானே. நாம் சொன்னபடி நடப்பதில் என்ன தவறு? ஒருவரை 4 மணிக்கு சந்திப்பதாய்ச் சொன்னால், 4 மணிக்கு அந்த இடத்தில் இருக்க வேண்டும் தானே? கடைசி நேர மாறுதல்கள் ஏன்? கைபேசியில் அறிவித்து விடலாம் என்பதால் நேரத்தை சரியாகக் கடைப்பிடிக்காமல், பிறரைக் காக்க வைப்பது மட்டும் சரியா? அது மட்டும் மரியாதையான செயலா? இந்த மூன்று ஆண்டுகளில் ஒரு முறை மட்டுமே காலதாமதமாகப் போயுள்ளேன். ஹோட்டல் பெயர் மீதான குழப்பத்தால் வேறு ஒரு இடத்திற்குப் போய்விட்டேன். வேறு எப்போதும் காலதாமதம் ஆனதே இல்லை.

இப்போதெல்லாம் பேசுவதற்குப் பதிலாக sms, WhatsApp, email போன்றவற்றையே பலரும் பயன்படுத்துகின்றனர். என்னை தொலைபேசியில் அழையுங்கள் என்று சொன்னால் ஒரு மாதிரியாகப் பார்க்கிறார்கள்.

பிறருடன் எப்போதும் தொனர்பிலேயே இருப்பது எனக்கு சரியாகப் படவில்லை. கைதிகளைக் கண்காணிக்க அவர்கள் உடலில் சிப் பொருத்துவது பற்றி கேள்விப் பட்டிருப்போம். ஆனால், நாம் செய்வது என்ன? எப்போதும் யாரும் நம்மைத் தொடர்பு கொள்ளும் வகையில் நாமே நம்மை கைதிகளாக்கிக் கொண்டுள்ளோம். நம்முடன் நாம் பேச, வாசிக்க, யோசிக்க, தனிமையை, இசையை, இயற்கையை, நம் எண்ணங்களை அனுபவிக்க நமக்கு நேரமே இருப்பதில்லையே.

நான் பிரச்சாரம் செய்வதாகத் தோன்றலாம். ஆனால் நான் விளக்க விரும்புவது என்னவெனில் கைபேசி இல்லாமல் இருப்பது எனக்கு முழு சுதந்திரம் தந்துள்ளது. நான் தாமதமாகச் சென்ற அந்த வியாபாரச் சந்திப்புக்குப் பின், சக நிறுவனர் சொன்னார். ‘ஸ்டீவ். நீ ஒரு கைபேசி வாங்கியே ஆக வேண்டும்.’ அதைக் கேட்டு என் கண்கள் கலங்கி கண்ணீர் விட்டன. எனக்கு மீண்டும் கவலை மிகுந்த, அவசரமான, நிம்மதியற்ற வாழ்க்கை வந்துவிடுமோ என்று பயந்தேன். ஆனாலும் அவர் என் முடிவுகளைப் புரிந்து கொண்டார்.

என் கதையைக் கேட்கும் பலரின் பதில் இது. ‘நீங்கள் அற்புதமான வாழ்க்கை வாழ்கிறீர்கள். என்னாலும் இப்படி வாழ முடிந்தால், என் வாழ்க்கையும் மிக இனிதாக இருக்கும்.’

உங்களாலும் இப்படி வாழ முடியும். எல்லோராலும் முடியும். பல நூற்றாண்டுகளாக மனித இனம் கைபேசி இல்லாமல் வாழ முடிந்த போது, நம்மால் வாழ முடியாதா என்ன? சரியான திட்டமிடலும் ஒழுங்கும் மட்டுமே தேவை. தெளிவான பிற தொடர்பு வழிகளை அறிவித்து விட்டு, ஒரு வாரம் கைபேசி இல்லாமல் வாழ்ந்து பாருங்கள். விளைவுகளைப் பொறுத்து அதை நீட்டியுங்கள். உங்களையே நீங்கள் புதிதாகக் கண்டுபிடிப்பீர்கள்.

வாழ்த்துகள்.

உங்கள் அனுபவங்களை என்னிடம் பகிர நினைத்தால் மின்னஞ்சல் அனுப்புங்கள். அட. நான் டுவிட்டரில் கூட இருக்கிறேன். @stevehiltonx

Steve Hilton, crowd PAC நிறுவனத்தின் CEO. அவரது நூல் More human ஆகும்.

டயஸ்போராவிற்கு உங்களை வரவேற்கிறோம் / ஸ்ரீநிவாசன் ( லண்டன் )

download (2)

இணைய உலகில் எண்ணற்ற சமூக வலைத்தளங்கள் நாள்தோறும் பெருகி வருகின்றன. மக்களும் கிடைக்கும் அனைத்து வழிகளிலும் தமது எண்ணங்களையும் படைப்புகளையும் பகிர்ந்து வருகின்றனர்.

மின்னஞ்சல் குழுக்கள், வலைப்பதிவுகள், டுவிட்டர், டுவிட்லாங்கர், முகநூல், மீடியம், டம்ளர் எனப் பல்வேறு தளங்கள் நம் எண்ணங்களைப் பகிர உதவுகின்றன.

இவற்றுள் முகநூல் ஆரம்பம் முதல் பல்வேறு வசதிகளை அளித்து, சமூக வலைத்தளங்களில் முதல் இடத்தைப் பிடிக்க முயற்சி செய்து வருகிறது. இந்த முயற்சிகளில் முகநூல் நிறுவனம் உருவாக்கும் சிக்கல்கள் ஏராளம். நமது தகவல்களைப் பிற நிறுவனங்களுக்கு விற்பது, Free Basics போன்ற திட்டங்களால் இணையச் சமநிலையைக் குலைப்பது போன்ற பல செயல்களை செய்கிறது முகநூல் நிறுவனம்.

மென்பொருள் உலகின் எல்லாத் தேவைகளுக்கும் சிக்கல்களுக்கும் தீர்வு காணும் கட்டற்ற மென்பொருள் ஆர்வலர்கள் முகநூலின் ஆதிக்கத்தில் இருந்து மக்கள் அனைவரையும் விடுவிக்க முடிவு செய்து, டயஸ்போரா என்ற கட்டற்ற சமூக வலைத்தள மென்பொருளை உருவாக்கியுள்ளனர்.

நமது தகவல்கள் நமக்கே சொந்தம்.

இந்த டயஸ்போரா மென்பொருள் தனி ஒரு நிறுவனத்திற்கு சொந்தமானதல்ல. இது ஒரு கட்டற்ற மென்பொருள். இதை யாரும் இலவசமாகப் பதிவிறக்கலாம். மாற்றங்கள் செய்யலாம். யாருடனும் பகிர்ந்து கொள்ளலாம். நமது வீட்டுக் கணினியில், நமது சர்வரில் என எங்கும் நிறுவிக் கொள்ளலாம். நமது சர்வர் மூலம் நாம் பகிரும் தகவல்கள் நம்மிடம் மட்டுமே இருக்கும். வேறு யாரும் அவற்றை சொந்தம் கொண்டாட இயலாது.

முகநூல் அப்படி அல்ல. முகநூலில் நாம் பகிரும் தகவல்களும், புகைப்படங்களும், காணொளிகளும் முகநூல் நிறுவனத்திற்குச் சொந்தமானவை. எப்போது நினைத்தாலும் முகநூல் நிறுவனம் நமது ஆக்கங்களை நீக்கிவிடும்.

பரவலான மென்பொருள்

முகநூல் அதன் நிறுவனத்தின் சர்வர்களில் மட்டுமே நிறுவப் பட்டுள்ளது. டயஸ்போரா உலகெங்கிலும் உள்ள சர்வர்களில் நிறுவப்பட்டு பராமரிக்கப் படுகிறது. இவை pod எனப்படுகின்றன. இணையத்தில் எங்கு நிறுவப்பட்டாலும் இந்த pod கள் பிற pod களை தாமே கண்டறிந்து அவற்றுடன் இணைந்து ஒரே மென்பொருள் போன்ற அமைப்பை ஏற்படுத்துகின்றன.

இதனால் உங்கள் சொந்த pod, உங்கள் நண்பர்களின் pod, அல்லது இணையத்தில் இருக்கும் பல்லாயிரக்கணக்கான pod களில் ஏதோ ஒன்று வழியாக இணைந்து உங்கள் தகவல்களைப் பகிர்ந்து கொள்ளலாம்.

முழு சுதந்திரம்

சில சமூக வலைத்தளங்கள் உங்கள் கைபேசி எண்ணைக் கேட்டு உங்களை அடையாளப்படுத்துகின்றன. டயஸ்போராவில் இது போன்ற சிக்கல்கள் இல்லை. நீங்கள் முழுமையாக அடையாளம் காண இயலாதவாறு கூட உங்களை மறைத்துக் கொண்டு இயங்க முடியும்.

சிறப்புகள்.

1. பகிர்தல்

யார்யாருடன் உங்கள் ஆக்கங்களைப் பகிர்வது என்பது உங்கள் முழுக் கட்டுப்பாட்டில் இருக்கும்.

2. #குறிச்சொற்கள்

# என்று ஒரு வார்த்தைக்கு முன் எழுதி அதைக் குறிச்சொல்லாக்கலாம். அதைக் கொண்டு தேடுவது மிக எளிது.

3. விருப்பம், பகிர்வு

பிறர் ஆக்கங்களை விரும்பலாம். பகிரலாம்.

4. @பெயர்

நண்பரின் பெயர் முன் @ சேர்த்து அவரை உரையாடலில் குறிப்பிடலாம். இது அவருக்கு அறிவிக்கப்படும்.

5. பிற சமூக வலைத்தளங்களுடன் இணைப்பு

நீங்கள் டயஸ்போராவில் எழுதுபவை பிற சமூக வலைத்தளங்களைப் போய் சேர ஏற்பாடு செய்யலாம். இதனால் உங்கள் ஆக்கங்கள் அங்கு உள்ளவர்களையும் சென்றடையும்.

6. அரட்டை

XMPP என்ற protocol மூலம் எந்த ஒரு அரட்டை மென்பொருள் வழியாகவும் டயஸ்போரா நண்பர்களுடன் அரட்டை அடிக்கலாம்.

7. கைபேசி

கைபேசியின் உலாவியில் எளிதாக அணுகலாம். செயலிகளும் உருவீக்கப்பட்டு வருகின்றன.

8. மொழியாக்கம்

கட்டற்ற மென்பொருள் என்பதால் உலகின் எந்த மொழியிலும் மொழியாக்கம் செய்து விடலாம்.

9. தொடர்ந்த மேம்பாடுகள்

Ruby On Rails என்ற நிரலாக்க மொழிக் கட்டமைப்பைக் கொண்டு உருவீக்கப் பட்டுள்ளது டயஸ்போரா. உலகெங்கும் உள்ள ரூபி நிரலாளர்கள் இணைந்து தொடர்ந்து புது வசதிகளை அளித்து வருகின்றனர்.

வாருங்கள். டயஸ்போராவில் பேசுவோம்.

உங்களுக்கு விருப்பமான டயஸ்போரா pod ஐத் தேர்ந்தெடுக்க இங்கு செல்க. அதில் ஒரு கணக்கு உருவாக்கி, பிற நண்பர்களுக்கும் அறிமுகம் செய்து, அழைக்கவும்.

மென்பொருள் உலகில் நமக்கு விடுதலை அளிக்கும் கட்டற்ற மென்பொருட்களுக்கு யாவரும் எளிதில் தரக்கூடிய பங்களிப்பு, அவற்றைப் பயன்படுத்துவதுதான்.

வாருங்கள். டயஸ்போராவில் பேசுவோம்.

நான் பயன்படுத்தும் pod : http://diasp.in

எனது டயஸ்போரா கணக்கு : tshrinivasan@diasp.in

சில முக்கிய இணைப்புகள்.

https://joindiaspora.com/

https://podupti.me/

https://wiki.diasporafoundation.org/Choosing_a_pod

15 வது உலகத் தமிழ் இணைய மாநாடு 2016

images (19)

உத்தமம் நிறுவனமும் காந்தி கிராம கிராமியப் பல்கலைக்கழகமும்

இணைந்து வழங்கும்

15 வது உலகத் தமிழ்

இணைய மாநாடு 2016

இடம்: காந்திகிராம கிராமிய பல்கலைக்கழகம் , திண்டுக்கல்

நாள் : 9,10,11 செப்டம்பர், 2016

தமிழ் இணைய மாநாடும் அதன் பயன்பாடுகளும்

உலகத் தமிழ்த் தகவல் தொழில்நுட்ப மன்றம் (உத்தமம் http://www.infitt.org) 1999ல் இலாப நோக்கற்ற நிறுவனமாக, அமெரிக்கக் கலிபோர்னியா மாநிலத்தில் பதிவு செய்யப்பட்ட ஒரு உலகளாவிய அமைப்பாகும். சிறப்பு நுட்பியல் நுண்ணறிவும், தொழில் வல்லமையும் பெற்ற தன்னார்வத் தொண்டர்கள் பலரின் விடாமுயற்சியால் 1990-களின் இறுதியிலிருந்து தமிழ்க்கணிமைத் துறையை வளர்க்கும் பணியில் இவ்வமைப்பு இயங்கிவருகிறது. சுவிட்சர்லாந்து, ஐக்கிய நாடுகள், ஜெர்மனி, பிரான்ஸ், அமெரிக்கா, கனடா, ஆஸ்திரேலியா, சிங்கப்பூர், மலேசியா, இலங்கை, இந்தியா உள்ளிட்ட பல்வேறு நாடுகளைச் சேர்ந்தோர் உத்தமம் நிறுவனத்தின் உறுப்பினராவர்.

தமிழ் இணைய மாநாடு 2016

தமிழும் அறிவார்ந்த பொருட்களுக்கான இணையமும், அச்சு, புகைப்பட மற்றும் ஓலைச்சுவடிகளுக்கான எழுத்துணர்வி தொழில்நுட்பம், மருத்துவத் துறைக்கான தமிழ்கணிமை தொழில்நுட்பங்கள், கணினி உதவியுடன் தமிழ்கற்றல், இயல்மொழி உருவாக்கம், அலைபேசித் தொழில்நுட்பம், பெருந்தரவகம் (BigData) போன்ற கருப்பொருட்களில் செப்.9,10,11 2016 ஆகிய மூன்று நாட்கள் திண்டுக்கல் காந்திகிராம கிராமியப் பல்கலைக்கழகத்தில் நடைபெறவிருக்கும் இம்மாநாடு ஆய்வுக் கருத்தரங்கு, கண்காட்சி அரங்கு, மக்கள் அரங்கு எனும் மூன்று பிரிவுகளாக நடத்தப்படும்.

இம்மாநாட்டின் கருத்தரங்க அமர்வுகளில் படிப்பதற்கென கீழ்க்கண்ட தலைப்புகளில் ஆய்வுக்கட்டுரைகள் வரவேற்கப்படுகின்றன

இயல்மொழிப் பகுப்பாய்வு – சொற்பிழை திருத்தி, சந்திப்பிழை திருத்தி, இலக்கணத்திருத்தி மற்றும் இவை தொடர்பான ஆய்வுகள்.
இயந்திர மொழிபெயர்ப்பு, தமிழ் எழுத்துருப் பகுப்பான்கள், தமிழ்ப் பேச்சுப் பகுப்பாய்வு, தேடுபொறிகள், தமிழ்த் திறனாய்வு நிரல்கள், மின்னகராதி அமைத்தல் தொடர்பான ஆய்வுகள்.
• ஒளியெழுத்துணரி மற்றும் கையெழுத்துணரி.

• கையடக்கக் கணினிகளில் தமிழ்ப் பயன்பாடும் அவற்றின் செயலிகளைத் தரப்படுத்தலும், இக்கருவிகளில் பயன்படுத்தத் தேவையான தமிழ்க்கணினி குறுஞ்செயலிகள் (முக்கியமாக ஆப்பிள், ஆண்ட்ராய்டு, விண்டோஸ்)

• திறவூற்றுத் தமிழ் மென்பொருள்கள், தன்மொழியாக்கம்.

• கணினி மற்றும் இணையவழி தமிழ்க்கல்வி கற்றல், கற்பித்தல்.

• தமிழ் இணையம், தமிழ் வலைப்பூக்கள், விக்கிபீடியா, சமூக இணையதளங்கள்…

• தமிழ் மின்நூலகங்கள், மின்பதிப்புகள், இணைய, கணினிவழி தமிழ்நூல்கள் ஆய்வு, கையடக்க மின்படிப்பான்களில் தமிழ் நூல்கள்…

• தமிழ் மின்வணிகம் மற்றும் பிற தமிழ்ப் பயன்பாட்டு நோக்குடன் தயாரிக்கப்பட்ட கணினி மென்பொருள்கள்.

• தமிழ் இணைய பாதுகாப்பு

• செல்பேசிக்கணிமைக்கான தொழில்நுட்பம்

• தமிழ் இணையத்தளங்களுக்கான தொழில்நுட்பம்

• தொழில்நுட்ப யுகத்தில் தமிழ் வகுப்பறைகள்

• தாய்மொழி வழி கற்றல் கற்பித்தலில் உள்ள தடைகள், சவால்கள், தீர்வுகள்

• இணையமும், தமிழ் வளர்ச்சியும்

மேலும் மொழியியல் துறை மற்றும் கணினி அறிவியல் துறையைச் சார்ந்த

ஆராய்ச்சியாளர் இயந்திர மொழிபெயர்ப்பு (machine translation), தடவரையிலிருந்து பேச்சு (text to speech), ஒளிவழி எழுத்துணரி (OCR), திறன்வழி கையெழுத்துணரி (ICR), தரவுச் செலுத்தங்கள் (data processing), அலை பேசிக் கணிமைகள் (mobile computing) போன்ற தலைப்புகளில் 100க்கும் மேற்பட்ட ஆராய்ச்சிக் கட்டுரைகளை இக்கருத்தரங்கில் எதிர்பார்க்கின்றோம்!

கணினியில் தமிழ், கையடக்கக் கருவிகள், வலைப்பயன்பாடு போன்றவற்றை ஊக்குவித்து மாணவர் திறன்களை வளர்க்கும் வகையில் பல போட்டிகளையும், சவால்களையும் உருவாக்கும் திட்டங்கள் இம்மாநாட்டின் ஒரு பகுதியாகும்.

மக்கள் அரங்கம்

பொதுமக்களுக்கும், மாணவருக்கும் அலைபேசிகளுக்கான குறுஞ்செயலி உருவாக்கும் பயிற்சி, இணையம் சார்ந்த பயிற்சி, மொழியியல், மேகக்கணிமை தொழில்நுட்பம், மற்றும் வலைப்பதிவு உருவாக்கம், கணினி சார்ந்த பயிற்சிகள் கொடுக்கப்படவுள்ளன.

கண்காட்சி

சிறு குழந்தைகள், பாலர் பள்ளியிலிருந்து பல்கலைக் கழகம் வரை எல்லோரும் பயன்பெறும் வகையில் பலகைக் கணினி முதல் அனைத்துக் கருவிகளும் தமிழ்க் கருப்பொருளுடன் விற்பனைக்குக் கிடைக்கும். தமிழ்ச்சமூகம் பெருமளவு பயன்பெறப் பல்லூடகக் கருவிகள் அறிமுகப்படுத்தப்படும். கண்காட்சி மையத்தில் சுமார் 50 விற்பனையாளர் தமிழ்கற்க உதவும் ஒலிக் குறுவட்டு, காணொளிக் குறுவட்டு, தமிழ்கற்க உதவும் நூல்கள், கண்ணொளி இழந்தோர் தமிழ் கற்பதற்கான பிரெயில் புத்தகங்கள், இவை அனைத்தின் வளர்ச்சி பற்றிய நூல்களின் தொகுப்பு ஆகியவை பொது மக்களைச் சென்றடையும் வகையில் வழங்கவிருக்கிறார்கள்.

மாநாடுக்கான பதிவு உட்பட அனைத்து விபரங்களும்

http://www.tamilinternetconference.org இணையத்தளங்களில் உடனுக்குடன் பதிவேற்றம் செய்யப்படும்.

இம்மாநாட்டுத் தொடர்பில் மேலும் தகவல் பெற விரும்பினால் helpdesk@infitt.org என்ற மின்முகவரிக்கு மின்மடல் அனுப்பியோ திரு. செல்வமுரளி, ed@infitt.org or
+91 99430-94945 என்ற எண்களைத் தொடர்பு கொண்டோ தெரிந்துகொள்ளலாம்.

மாநாட்டு ஆய்வரங்குகளில் கட்டுரை படைக்க விரும்புவோர் தாங்கள் படைக்க இருக்கும் கட்டுரையின் சுருக்கத்தை A4 தாள் அளவில் 1-2 பக்கங்களில் மே மாதம் 15ம் தேதிக்குள் cpc2016@infitt.org என்ற மின்னஞ்சலுக்கு PDF Format-ல் அனுப்புமாறு கேட்டுக்கொள்கிறோம். மாநாட்டுக்குழு உங்களின் படைப்புகளை ஆய்ந்தறிந்து மாநாட்டில் படைக்கும் தரம்கொண்ட கட்டுரைகளைத் தேர்வு செய்யும். தேர்வு செய்யப்பட்ட கட்டுரைகளின் விவரம் அதற்கான ஆசிரியர்களுக்கு மே 31 ஆம் தேதிக்குள் மின்னஞ்சல் மற்றும் இணையத்தளம் வழியாக உறுதிப்படுத்தப்படும். பின்னர் சூன் 15 ஆம் தேதிக்குள் முழுக்கட்டுரையையும் அனுப்பிவைக்க வேண்டும்.

கட்டுரைச் சுருக்கம் மற்றும் கட்டுரையைத் தமிழ் ஒருங்குறி (Unicode) அல்லது தமிழ் அனைத்து எழுத்துருத் தரப்பாடு (TACE16) ஆகிய குறியேற்றங்களில் மட்டுமே பெற்றுக்கொள்ள இயலும் என்பதைத் தெரிவித்துக்கொள்கிறோம். கட்டுரைச் சுருக்கம் ஆங்கிலத்திலோ (அ) தமிழிலோ (அ) தமிழும் ஆங்கிலமும் கலந்தோ நீங்கள் படைக்கலாம்.

ஒன்றுக்கும் மேற்பட்ட கட்டுரையாளர்கள் எழுதும் கட்டுரையாளர்களுள் ஒருவரேனும் மாநாட்டில் கலந்துகொண்டு கட்டுரையை ஆய்வரங்குகளில் நேரிடையாகப் படைக்க வேண்டும்.

மாநாட்டில் பங்குபெறாமல் அல்லது ஒருவருக்காக வேறு ஒருவர் கட்டுரைகளைப் படைக்க இயலாது என்பதையும் தெரிவித்துக்கொள்கிறோம்.

மாநாட்டில் படைக்கப்படவுள்ள கட்டுரைகள் அச்சிட்ட மாநாட்டு மலராகவும் மின்பதிப்பாகக் குறுந்தகடு வழியாகவும் வெளியிடப்பட உள்ளது. மாநாட்டுக் கட்டுரைத் தொகுப்பு நூலகங்களுக்கான பன்னாட்டு தொடர்திரவு (ISSN) எண்ணுடன் வெளியிடப்படவுள்ளது.

தேர்ந்தெடுக்கப்படும் கட்டுரைகள் சிறப்பு வெளியீடாக உத்தமத்தின் வாயிலாக வெளிவரவிருக்கும் இதழிலும் இதர பன்னாட்டு இதழ்களிலும் வெளியிடப்படும்.

முக்கியமான நாட்கள்

கட்டுரைச் சுருக்கம் அனுப்ப இறுதி நாள் : மே 15

தேர்வு செய்யப்பட்ட கட்டுரை பற்றிய அறிவிப்பு : மே 31

முழுக் கட்டுரை அனுப்ப இறுதி நாள் : ஜூன் 15

தங்கள் உண்மையுள்ள

திரு.இனிய நேரு,

தலைவர், உத்தமம்

உத்தமம் செயற்குழு உறுப்பினர்கள்

திரு.இனிய நேரு, இந்தியா

திரு.சுகந்தி நாடார், அமெரிக்கா

திரு.செல்வமுரளி, இந்தியா

முனைவர். கல்யாணசுந்தரம், சுவிட்சர்லாந்து

முனைவர் .வாசு அரங்கநாதன், அமெரிக்கா

திரு.மணியம், சிங்கப்பூர்

திரு.இளந்தமிழ், மலேசியா

முனைவர். துரை.மணிகண்டன், இந்தியா

திரு.சரவணபவானந்தன், இலங்கை

உத்தமம் இந்தியக்கிளை

திரு.என்.டி.லோகசுந்தரம்

முனைவர் காமாட்சி

முனைவர் துரைமணிகண்டன்

முனைவர் பன்னிருகை வடிவேலன்

திரு.சீனிவாசன்

திருமதி . ஆரோக்கியசெல்வி

பத்திரிக்கையாளர் சந்திப்பில் கலந்துகொண்டவர்கள்

முனைவர்.பொன்னவைக்கோ, துணைவேந்தர் , பாரத் பல்கலைக்கழகம்

முனைவர். நடராஜன், துணைவேந்தர், காந்திகிராம கிராமியப் பல்கலைக்கழகம்

திரு.இனிய நேரு, தலைவர் , உத்தமம்

திரு.செல்வமுரளி, செயல் இயக்குநர், உத்தமம்

பேராசிரியர் திரு.பத்மநாப பிள்ளை, புலத் தலைவர்

திரு.முத்தையா, மக்கள் தொடர்பு அலுவலர், காந்திகிராம கிராமியப் பல்கலைக்கழகம்

திரு.துரைமணிகண்டன், செயற்குழு உறுப்பினர்

மற்றும் இந்தியக்கிளை உறுப்பினர்கள்

திரு.என்.டி.லோகசுந்தரம், முனைவர் காமாட்சி, முனைவர் துரைமணிகண்டன்

முனைவர் பன்னிருகை வடிவேலன், திரு.சீனிவாசன், திருமதி . ஆரோக்கியசெல்வி

இதுவரை நடந்த தமிழ் இணைய மாநாடுகள் விபரம்

முதல் தமிழ் இணைய மாநாடு – 1997 ஆம் ஆண்டு – சிங்கப்பூர்.

இரண்டாம் தமிழ் இணைய மாநாடு – 1999 ஆம் ஆண்டு சென்னை, தமிழ்நாடு, இந்தியா.

மூன்றாம் தமிழ் இணைய மாநாடு – 2000 ஆம் ஆண்டு – சிங்கப்பூர்.

நான்காம் தமிழ் இணைய மாநாடு – 2001 ஆம் ஆண்டு – கோலாலம்பூர், மலேசியா.

ஐந்தாம் தமிழ் இணைய மாநாடு – 2002 ஆம் ஆண்டு – சான் பிரான்சிசுகோ, அமெரிக்கா.

ஆறாம் தமிழ் இணைய மாநாடு – 2003 ஆம் ஆண்டு – சென்னை, தமிழ்நாடு, இந்தியா.

ஏழாம் தமிழ் இணைய மாநாடு – 2004 ஆம் ஆண்டு – சிங்கப்பூர்.

எட்டாம் தமிழ் இணைய மாநாடு – 2009 ஆம் ஆண்டு – கொலோன், செருமனி.

ஒன்பதாம் தமிழ் இணைய மாநாடு – 2010 – கோயம்புத்தூர், தமிழ்நாடு,

பத்தாவது தமிழ் இணைய மாநாடு – 2011 ஆம் ஆண்டு – பிலடெல்பியா, பென்சில்வேனியா, அமெரிக்கா.

பதினொன்றாவது தமிழ் இணைய மாநாடு – 2012 ஆம் ஆண்டு – சிதம்பரம், தமிழ்நாடு, இந்தியா.

பன்னிரண்டாவது தமிழ் இணைய மாநாடு – 2013 ஆம் ஆண்டு – கோலாலம்பூர், மலேசியா.

பதின்மூன்றாவது தமிழ் இணைய மாநாடு – 2014 ஆம் ஆண்டு – புதுச்சேரி, இந்தியா.

பதினாலாவது உலகத் தமிழ் இணைய மாநாடு – 2015 ஆம் ஆண்டு – சிங்கப்பூர்.

www.infitt.org www.tamilinternetconference.org