சுரேஷ் பரதன். கவிதைகள்

[ A+ ] /[ A- ]

download (42)

1. இரகசியங்கள் ஜொலிக்கின்றன…

இரகசியமாய் ஒளித்து வைத்திருக்கிறேன்
சில இரகசியங்களை இதயத்தின்
ஓர் அறையில்.

அவ்வறையில்
ஒரு இரகசியத்தின் இரகசியம்
இன்னொரு இரகசியம்
அறியா வண்ணம்
ஒவ்வொன்றிற்கும் காவலாய்
ஒரு தேவதை இருக்கிறாள்.

அந்தத் தேவதையோ
தான் காவல்புரியும்
இரகசியத்தின் சாரங்களை
அணிகலனென அணிந்திருக்கிறாள்.

ஒவ்வோரு தேவதைக்கும்
ஒவ்வொரு அணிகலன்.

அந்த தேவதைகள் தங்கள்
இரகசியத்தின் கானங்களை
என் காதோரம் பாடிக் கொண்டிருக்கிறார்கள்.

சில சமயங்களில் அப்பாடல்கள்
இரகசியத்தின் விடுதலை
குறித்தவையாய் இருக்கின்றன.

என்றைக்கு ஒரு இரகசியம்
விடுதலையடைகிறதோ
அன்றைக்கு அந்த தேவதை
என்னிலிருந்து பறந்து செல்கிறாள்.

இதோ எப்போதும் என்னைச் சுற்றிப்
பறக்கும் தேவதைகளைப் பாருங்கள்.
அவர்களின் அணிகலன்கள்
எவ்வளவு அழகாய் ஜொலிக்கின்றன.

2. குரூரத்தின் மிகுதி

உடலின் குருதியை
நெற்றி வியர்வையாய்
உருமாற்றியவன்
நிலத்தை ஈரப்படுத்தி
பசியோடு கண் துஞ்சுகிறான்.

புறங்கையை தலையணையாய் மாற்றி
உறங்குபவனின் அருகில்
அமைதியாக படுத்திருக்கிறது
சமூகப் பிறழ்வின் அகங்காரங்களைச்
சுக்குநூறாய் உடைத்தெரியும்
கனத்த சுத்தியல்.

சற்றுமுன்னர் அவன்
உடைத்த பாறையிலிருந்து
சிதறி தனியே தெறித்து விழுந்த
சிறுகல்லொன்று
பொருளாதார கோலியாத்தின்
நெற்றிப் பொட்டை
குறியாய் தாக்கும்
டேவிட்டின் கவணுக்கென
காத்திருக்கிறது.

3. தவறாத குறி

இதோ இந்த மேஜை மேல்
வைக்கப்பட்டிருக்கும் தோட்டா
ஒரு நைன் எம்மெம் ரிவால்வரிலிருந்து
வெளி வந்த ஒன்று.

சுற்றியிருக்கும் இரத்தக் கறை
அது சுடப்பட்டு நேரமாகவில்லை யென
தெரிவிக்கிறது.

இந்த தோட்டாவைக் கொண்டு
அதன் உரிமையாளரை வெகுச்
சுலபமாக கண்டுபிடித்துவிட முடியும்.
சுட்டவனை அல்ல.

அந்த இரத்தக்கறைகளை துடைத்து பாருங்கள்.
ஒருவேளை அதில் பெயரெழுதியிருக்கக் கூடும்.

ஒவ்வொரு கோதுமையிலும் அதைப்
புசிப்பவனின் பெயரிருக்குமாமே
அதைப் போல.

நிசமாகத்தான் சொல்கிறீர்களா..

நீங்கள் ஏன் உங்கள் தொப்பிகளை
கழற்றிக் கையிலடுத்து நெஞ்சோடு
அணைத்துக் கொள்கிறீர்கள்..

அதில் … அதில்…

என் பெயரா எழுதியிருக்கிறது.

~~~

Comments are closed.